ԵՐԵՎԱՆ, 3 հունիսի – Sputnik․ Արցախի Հանրապետության նախագահ Արայիկ Հարությունյանի գլխավոր խորհրդական Արթուր Աղաբեկյանն ազատվել է պաշտոնից։ Տեղեկությունը հայտնել է Արցախի նախագահի մամուլի քարտուղար Լուսինե Ավանեսյանը։
«Աղաբեկյանը նախագահի խորհրդականի պաշտոնում կմնա հասարակական հիմունքներով», - նշել է Ավանեսյանը:
Որոշման մանրամասների և պատճառների մասին նա չի հայտնել։
Արթուր Աղաբեկյանը նախագահի գլխավոր խորհրդական է նշանակվել 2020 թվականի հունիսի 8-ին։ 2000-2007թթ. զբաղեցրել է ՀՀ պաշտպանության նախարարի տեղակալի պաշտոնը:
Նշենք, որ 2018 թվականին ՀՀ քննչական կոմիտեն հաղորդագրություն էր տարածել` նշելով, որ մեծածավալ քննչական գործողությունների արդյունքում առանձնապես խոշոր չափերի գումարի վատնման դեպքեր են բացահայտվել «Մարտիկ» հիմնադրամում. մեղադրանք է առաջադրվել հիմնադրամի հոգաբարձուների խորհրդի նախագահ Արթուր Աղաբեկյանին։