ԵՐԵՎԱՆ, 31 մայիսի – Sputnik. ՀՀ ԱԳՆ մամուլի խոսնակ Աննա Նաղդալյանը ևս աշխատանքից ազատվելու դիմում է ներկայացրել։ Տեղեկությունը նա հայտնել է Facebook-ի իր էջում։
«Տեղեկացնեմ, որ այլևս չեմ կատարում ՀՀ ԱԳՆ մամուլի քարտուղարի պարտականությունները: Ցանկանում եմ շնորհակալություն հայտնել ԶԼՄ բոլոր ներկայացուցիչներին, ԱԳՆ գործընկերներիս, իմ թիմին՝ այս դժվարին և պատասխանատու ժամանակահատվածում արդյունավետ համագործակցության և աջակցության համար:
Առանձնահատուկ շնորհակալություն եմ հայտնում Արա Այվազյանին և Զոհրաբ Մնացականյանին՝ ցուցաբերած վստահության համար. մեծ պատիվ էր աշխատել նման փորձառու և հայրենասեր դիվանագետների հետ»,–գրել է նա:
Նա տեղեկացրել է, որ շարունակելու է աշխատանքը դիվանագիտական ծառայությունում:
ԱԳՆ գործունեության վերաբերյալ մեկնաբանությունների և այլ հարցերի համար կարող են դիմել spokesperson@mfa.am էլեկտրոնային հասցեով:
Նշենք, որ ՀՀ ԱԳ նախարարի պաշտոնակատար Արա Այվազյանը հրաժարականի դիմում էր ներկայացրել մայիսի 27–ին։ Մամուլը գրում էր, որ հրաժարականի պատճառը Նիկոլ Փաշինյանի հետ ունեցած հակասություններն են։
Այսօր էլ պաշտոնից հրաժարվեց ՀՀ արտաքին գործերի նախարարի տեղակալ Գագիկ Ղալաչյանը։
«Հայաստանն ու Արցախը պարտված չեն». Արա Այվազյանը հրաժեշտ է տվել ԱԳՆ անձնակազմին