ԵՐԵՎԱՆ, 27 մայիսի – Sputnik․ Պաշտպանության նախարարությունը, սանդրանքներին չտրվելով, անում է և անելու է հնարավոր ամեն ինչ իրավիճակը շտկելու համար։ Այսօր Ազգային ժողովում լրագրողների հետ ճեպազրույցի ժամանակ նման հայտարարություն արեց ՀՀ պաշտպանության փոխնախարար Արման Սարգսյանը։
«Մեր վեց գերիների մասին ես ավելի շատ եմ մտածում, քան, ներեցեք, դուք»,- լրագրողներին ասաց Սարգսյանը։
Նա հավելեց, որ ամեն ինչ արվում է, որ վեց զինծառայողները վերադարձվեն հայրենիք և ապագայում նման իրավիճակներ չկրկնվեն։
«Ձեռնարկելու ենք յուրաքանչյուր քայլ այդ գերիներին վերադարձնելու համար։ Իմ ասածի տողատակերում ամեն ինչ ասվեց»,- նշեց Սարգսյանը։
Նա կոչ արեց բոլորին համախմբվել պետության և բանակի շուրջ։ Ադրբեջանը մեծ քանակությամբ ապատեղեկատվություն է շրջանառում։
Սարգսյանը զգուշացրեց՝ պետք է կուլ չտալ ադրբեջանական խայծը։
Անդրադառնալով Սյունիքի իրավիճակին, ՊՆ փոխնախարարը նշեց, որ իր ԱԺ գալու դրությամբ Սյունիքում իրավիճակը նորմալ է եղել։
Ինչպես արդեն հայտնել էինք, մայիսի 26–ի լույս 27–ի գիշերը ադրբեջանական կողմը Գեղարքունիքի սահմանային հատվածում 6 հայ զինծառայողի է գերեվարել։
Հիշեցնենք` ադրբեջանցի զինվորականները մայիսի 12-ից Հայաստանի Սյունիքի մարզում գտնվող Սև լճի տարածքում են և փորձում են ամրապնդվել այնտեղ։ Նմանատիպ իրավիճակ է նաև Գեղարքունիքի մարզի Կութ, Վերին Շորժա և Նորաբակ գյուղերի հատվածում։
Ռուսական կողմի միջնորդությամբ բանակցությունների մի քանի փուլ է կայացել։ Հակառակորդն առայժմ հեռանալու մտադրություն դեռ չունի։ Հայաստանը դիմել է ՀԱՊԿ-ին և ռազմական օգնություն խնդրել Ռուսաստանից։
Գերեվարված հայ զինծառայողները գտնվել են ՀՀ տարածքում. ՊՆ-ն քարտեզ է ներկայացրել
Ռազմաքաղաքական ղեկավարությունը հայտարարում է, որ ցանկանում է խնդիրը լուծել խաղաղ ճանապարհով, բայց չի բացառում նաև ուժի կիրառման տարբերակը, եթե բանակցությունները արդյունք չտան։
Ռազմաքաղաքական ղեկավարությունը հայտարարում է, որ ցանկանում է խնդիրը լուծել խաղաղ ճանապարհով, բայց չի բացառում նաև ուժի կիրառման տարբերակը, եթե բանակցությունները արդյունք չտան։
Բացի այդ, մայիսի 25-ին Գեղարքունիքի մարզի Վերին Շորժա գյուղի հատվածում հակառակորդի կողմից արձակված կրակոցներից մահացու վիրավորում է ստացել զինծառայող, կրտսեր սերժանտ Գևորգ Խուրշուդյանը: