ԵՐԵՎԱՆ, 27 մայիսի – Sputnik. ԴՆԹ անցած 100-ից ավելի աճյունների հարազատներն անհայտ են։ Այս մասին ասել է ՀՀ պաշտպանության նախարարության մարդու իրավունքների և բարեվարքության կենտրոնի պետ, անհայտ կորածներով զբաղվող հանձնաժողովի անդամ գնդապետ Գևորգ Մարտիրոսյանը։
«Ավելի քան 70 անհետ կորածի հարազատ էլ հրաժարվում է ԴՆԹ թեստ հանձնել», – ասել է գնդապետը։
Նա տեղեկացրել է, որ 2020-ի նոյեմբերից` անհայտ կորածներով զբաղվող հանձնաժողովի կազմավորման պահից, 1694 զինծառայողի և կամավորի հարազատներից դիմումներ են ստացվել։ Յուրաքանչյուրի վերաբերյալ կազմվել են անձնական գործեր։
«Յոթ ամիսների ընթացքում ՊՆ–ի, հարազատների և ռուսական կողմի ջանքերով հայտնաբերվել է 1270 աճյուն։ Նաև ցանկից որոշ զինծառայողներ և կամավորներ հաստատվել են գերեվարվածների ցանկում», – ասել է նա։
Մարտիրոսյանի խոսքով` անհայտ կորածների հարազատների առաջարկով հայկական կողմը դիմել է ռուսական կողմին` որոնման աշխատանքներին ներգրավելու աճյուններ որոնող հատուկ վարժեցված շների։
Ադրբեջանը 6 հայ զինվորական է գերեվարել
Նշենք, որ զինադադարից հետո փրկարար ջոկատների կողմից իրականացված որոնողական աշխատանքերի արդյունքում հայտնաբերված կամ ադրբեջանական կողմից հայկական կողմին փոխանցված աճյունների ընդհանուր թիվը 1557 է։