ԵՐԵՎԱՆ, 26 մայիսի – Sputnik. Ռուս խաղաղապահները կազմակերպել են մարդասիրական օգնության փոխանցումը Լեռնային Ղարաբաղի հեռավոր բնակավայրերի փախստականներին 7 բազմազավակ ընտանիքներին: Այս մասին հայտնում է ՌԴ ՊՆ մամուլի ծառայությունը։
Մասնավորապես, ռուսական հասարակական կազմակերպությունների և բարեգործական հիմնադրամների կողմից հավաքված օգնությունը ստացել են Մարտակերտի շրջանի Խնկավան և Չափար գյուղերի բնակիչները։ Հիմա երկու ավաններում ընդհանուր առմամբ մոտ 1000 մարդ է ապրում։ Նրանցից շատերն աջակցության կարիք ունեն։
Մարդասիրական ակցիայի ընթացքում ռուս խաղաղապահները փախստականներին և հարկադիր տեղահանվածներին փոխանցել են առաջին անհրաժեշտության և կենցաղային իրեր, հագուստ, հիգիենայի պարագաներ, խաղալիքներ և մանկասայլակներ:
Բացի այդ, ընտանիքները ստացել բժշկական առաջին օգնության անհատական փաթեթներ, որոնք ներառում են ամենաանհրաժեշտ դեղամիջոցների և վիրակապման պարագաների ոչ մեծ հավաքածու։
«Մարդասիրական ակցիաներն անցկացվել են, առաջին հերթին, բնակիչներին հագուստով, առաջին անհրաժեշտության պարագաներով և դեղորայքով ապահովելու նպատակով», - հայտնել է ռուսական խաղաղապահ զորախմբի հումանիտար արձագանքման կենտրոնի պետ Իգոր Սիվակովը:
Նրա խոսքով՝ փախստականներից բացի օգնություն են ստացել նաև բազմազավակ ընտանիքները, որոնք բավական շատ են այդ գյուղերում։
Ընդհանուր առմամբ, ռուս խաղաղապահները Լեռնային Ղարաբաղի բնակիչներին փոխանցել են մոտ 155 տոննա մարդասիրական բեռ:
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին:
Ղարաբաղում խաղաղապահ գործողության գինն ու վարկանիշը. թվերն ավելի քան խոսուն են