ԵՐԵՎԱՆ, 26 մայիսի - Sputnik. ՀՀ ազգային ժողովը երկրորդ ընթերցմամբ և ամբողջությամբ ընդունեց կառավարության ներկայացրած «Պետական տուրքի մասին» օրենքում լրացում կատարելու մասին օրենքի նախագիծը, որով առաջարկվում է ցեմենտի 1 տոննայի ներմուծման համար սահմանել 14 000 դրամ, իսկ ցեմենտի հումքի` կլինկերի 1 տոննայի ներմուծման համար՝ 2 000 դրամ պետական տուրք:
Նախագծին կողմ քվեարկեցին նիստին ներկա 91 պատգամավորներից 72–ը, դեմ` 7–ը, ձեռնպահ` 3–ը։
Հիշեցնենք` կառավարության ներկայացրած նախագծով առաջարկվում էր նախկինում գործող ցեմենտի 1 տոննայի ներմուծման համար պետական տուրքը 14 000 դրամից հասցնել 25 000–ի, իսկ ցեմենտի հումքինը՝ կլինկերինը, որն առայսօր անվճար էր, սահմանել 9 000 դրամ` 1 տոննայի դիմաց:
ԱԺ տնտեսական հարցերի հանձնաժողովում, սակայն, կառավարության առաջարկը չեն ընդունել` մտավախությամբ, որ դա կարող է վնասել տեղական արտադրողներին։
Կարմիր գծերը կչեղարկվեն, ցեմենտի տեղական արտադրողներին չեն աջակցի. քվեարկություն ԱԺ–ում
Փոխարենը պատգամավորներն առաջարկում են տուրքերը թողնել նախկին չափերով ու երկարաձգել օրենքի գործողության ժամկետը, քանի որ այն արդեն ավարտվել է 2020թ–ի դեկտեմբերին ու հունվարի 1-ից թե՛ ցեմենտը, և թե՛ կլինկերը դարձյալ ներկրվում են անվճար։
Կառավարությունն իր օրենսդրական նախաձեռնությունը հիմնավորում է տեղական արտադրությունը ներմուծումից պաշտպանելու ու տեղական արտադրանքը մրցունակ դարձնելու նպատակով։
Նշենք, որ պաշտոնական թվերով` 2020 թվականին Հայաստանում ցեմենտի արտադրության պատկերը հետևյալն է` 500 000 տոննա` «Արարատցեմենտ», 100 000 տոննա՝ «Շինցեմենտ», 100 000 տոննա՝ «Հրազդանցեմենտ», 200 000 տոննա՝ Իրանից ներմուծված։