ԵՐԵՎԱՆ, 25 մայիսի - Sputnik. Օրենքի փոփոխությամբ մարզասրահներ անվճար հաճախողների թվում չեն լինելու քաղաքական պաշտոն զբաղեցնողները։ ԱԺ նիստի ժամանակ հայտարարեց աշխատանքի և սոցիալական հարցերով փոխնախարար Ռուբեն Սարգսյանը` անդրադառնալով մեծ աղմուկ հանած նախագծին։
Հայտնել էինք, որ «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» ՀՀ օրենքում փոփոխություններ են նախատեսվում։ Նշվում էր, որ այսուհետ մարզասրահներ և լողավազաններ կարող են այցելել նաև պետական պաշտոնյաների ու պետծառայողների ընտանիքի անդամները։
«Նախագիծը չի ենթարկում շահառուների թվի ընդլայնում, սա վերաբերում է, օրինակ, քաղծառայողներին։ Շահարկվող գաղափարը, թե այսուհետ կարող են ծառայություններից օգտվել քաղաքական պաշտոն զբաղեցնողները` նախարարները, փոխնախարարները, վարչապետը, ԱԺ պատգամավորները, սխալ է` նախագիծը նրանց չի վերաբերում»,–ասաց Սարգսյանը։
Նա հիշեցրեց, որ փոփոխությունը վերաբերում է սոցփաթեթով մատուցվող ծառայություններին, մասնավորապես, այսուհետ մարզա-առողջարարական և սպորտային համալիրների, լողավազանների և այլ սպորտային կազմակերպությունների ծառայություններից սոցփաթեթի շահառուները կարող են անվճար օգտվել, ուսանողական վարկերն էլ կմարվեն պետական սուբսիդավորմամբ։
ԱԺ գլխադասային հանձնաժողովը նախագծին կողմ է արտահայտվել։
Պատերազմի բեկորները, կամ ինչպես փոխգնդապետ Ստեփանյանն օգնեց ճանաչել հայերին
Հիշեցնենք, որ սոցփաթեթի շահառու են հանդիսանում ոչ միայն պետական կառավարման համակարգի աշխատողները, այլ նաև հանրակրթական ուսումնական հաստատությունների, գրադարանների, թանգարանների, համերգային կազմակերպությունների, թատրոնների և մի շարք այլ կազմակերպությունների աշխատողներ: Սոցփաթեթի շահառու չեն հանդիսանում քաղաքական, պետական, վարչական պաշտոն զբաղեցնող և մի շարք այլ բարձրաստիճան պաշտոնատար անձինք։