ԵՐԵՎԱՆ, 25 մայիսի - Sputnik. Երկու օր առաջ ադրբեջանցիներն ընդլայնվել են ինչպես Սյունիքի սահմանի երկայնքով, այնպես էլ դեպի Գորայք։ Այսօր հրավիրված ասուլիսի ժամանակ տեղեկությունը հայտնեց Սյունիքի նախկին մարզպետ, «Հայաստան» դաշինքի անդամ Վահե Հակոբյանը։
«Իրավիճակը շարունակվում է մնալ ստաբիլ լարված։ Կարծում եմ` եթե մի քիչ էլ այսպես շարունակվի, սյունեցիները կսկսեն համակերպվել, որ մեր տարածքում տեղաբաշխված է Ադրբեջանի ԶՈւ–ն»,–ասաց Հակոբյանը։
Նրա խոսքով` իշխանության և պաշտպանության նախարարության ներկայացուցիչները կորցնում են իրավիճակի նկատմամբ վերահսկողությունը։ Հակոբյանը կարծում է, որ բանակցային գործընթացը մտնում է փակուղի, եթե արդեն չի մտել։
Հակոբյանի տեղեկություններով` իշխանությունը չգիտի` ինչ անել, քանի որ իրավիճակն ուժի միջոցով լուծելու պահը բաց են թողել։
«Ես էլի պնդում եմ, որ Սյունիքում տեղակայված են 1000-ից ավելի ադրբեջանական զինված ուժերի ներկայացուցիչներ»,-իր խոսքն ամփոփեց Հակոբյանը։
Հիշեցնենք` մայիսի 12-ի առավոտյան ադրբեջանական զինուժը «սահմանների ճշգրտման» հիմնավորմամբ փորձել է որոշակի աշխատանքներ իրականացնել Սյունիքի սահմանային հատվածներից մեկում, սակայն հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։
ՊՆ–ն մայիսի 13-ին հայտնեց, որ Ադրբեջանը հերթական սադրանքն է իրականացրել Վարդենիսի և Սիսիանի սահմանային հատվածներում։
«Ադրբեջանցիներն եկել են մեր տարածք, մեզ ասում են՝ փախեք-գնացեք». Խոզնավարը դատարկվում է
Մայիսի 14–ին Փաշինյանը հայտարարեց, որ կեսօրին պաշտոնապես դիմել են ՀԱՊԿ և ռազմական աջակցության հարցով դիմել ՌԴ նախագահ Վլադիմիր Պուտինին։
Մայիսի 13-ից ադրբեջանցիների հետ բանակցություններ են անցկացվում։
Մայիսի 20-ին էլ Սյունիքի մարզի Խոզնավար գյուղի հատվածում ՀՀ և ԱՀ ԶՈւ-երի զինծառայողների միջև ծեծկռտուք է տեղի ունեցել։ 11 հայ զինծառայող տեղափոխվել է հիվանդանոց։