ԵՐԵՎԱՆ, 24 մայիսի – Sputnik. «Քաղաքացիական պայմանագիր» կուսակցության ցուցակի առաջին հնգյակում ընդգրկված է լինելու հայտնի գործարար, ԱԺ նախկին պատգամավոր Խաչատուր Սուքիասյանը։ Տեղեկությունը հայտնում է armtimes.com–ը։
Վերջինիս մամուլի խոսնակը լրատվամիջոցի հետ զրույցում ասել է` երբ հստակություն լինի, հայտարարություն կանեն:
Դիտարկմանը, որ իրենց տեղեկություններով` արդեն համարն է որոշված, Աննա Մկրտչյանն ասել է, որ կփորձի կապ հաստատել պարոն Սուքիասյանի հետ և տեղեկությունը ճշտել:
Armtimes.com–ի տեղեկություններով` ՔՊ ցուցակի անցողիկ տեղերից մեկն էլ (13) բաժին է ընկնելու գործարար, «Միավորված աշխատանքային կուսակցության» նախագահ, ԱԺ նախկին պատգամավոր Գուրգեն Արսենյանին: Արսենյանը լրատվամիջոցի հետ զրույցում ո՛չ հերքել, ո՛չ հաստատել է այդ տեղեկությունը՝ կոչ անելով սպասել ցուցակի հրապարակմանը:
Մայիսի 26-ը ԿԸՀ-ին ցուցակներ տրամադրելու վերջնաժամկետն է: ԿԸՀ-ին տրամադրելուց հետո քաղաքական ուժերն իրենց ցուցակները կսկսեն հանրայնացնել:
Հիշեցնենք` Խաչատուր Սուքիասյանը ԱԺ պատգամավոր է եղել 1999-2003 և 2003-2007 թվականներին։ Խմբակցություններում և պատգամավորական խմբում ընդգրկված չի եղել: 2007թ. մայիսի 12-ին Ազգային ժողովի պատգամավոր է ընտրվել թիվ 10 ընտրատարածքից:
«Որոշել եմ արտահերթ ընտրություններին չառաջադրվել». Սասուն Միքայելյան
Գուրգեն Արսենյանը ԱԺ պատգամավոր է եղել 2000-2003թթ.–ին։ 2003-ին կրկին խորհրդարան է անցել համամասնական ընտրակարգով (ՄԱԿ): 2012թ. մայիսի 6-ին ԱԺ պատգամավոր է ընտրվել «Բարգավաճ Հայաստան» կուսակցությունից:
Ազգային ժողովի արտահերթ ընտրությունները նախատեսված են հունիսի 20-ին։
Բյուջեից 7 մլն դրամ է հատկացվել ընտրությունների դիտորդ պատվիրակությունների համար