Ադրբեջանցիների ներխուժումը Հայաստանի տարածք նպատակ ունի ՀՀ քաղաքացիների, առաջին հերթին սյունեցիների վրա հոգեբանական ճնշում գործադրել։ Sputnik Արմենիայի հետ զրույցում նման կարծիք հայտնեց քաղաքագետ Ստեփան Դանիելյանը։
«Նման երևույթներից հետո բնակչության շրջանում խորանում է արտագաղթի ու հուսալքության հարցը։ Այդկերպ Ալիևը փորձում է նաև ստիպել Հայաստանին ստորագրել ինչ-որ խաղաղության պայմանագիր, որով Հայաստանն իր վրա կվերցնի որոշակի պարտավորություններ, նաև կճանաչի Ադրբեջանի ամբողջականությունը»,- ասաց նա։
Այսքանով, սակայն, Բաքվի բռնապետի նկրտումները չեն սահմանափակվում։ Քաղաքագետը չի բացառում, որ օգտվելով առիթից Ադրբեջանն իր առջև խնդիր է դրել առավելագույնս բարձր դիրքեր զբաղեցնել և ինչքան հնարավոր է սահմանները որոշակի փոփոխությունների ենթարկել, նաև Ռուսաստանի վրա որոշակի ազդեցություն ունենալ։
«Փորձում է ցույց տալ, որ Ռուսաստանի ներկայությունը Արցախում կարող է հարցականի տակ դնել նմանօրինակ գործողությունները կյանքի կոչելը, ինչի հետևանքով կարող է դեստաբիլիզացիան ավելի տաք փուլ մտնել»,- նշեց Դանիելյանը։
Քաղաքագետը դժվարանում է ասել, աղմուկ հանած փաստաթուղթը միակն է, որի վրա աշխատում են կողմերը, թե այլ փաստաթուղթ կամ փաստաթղթեր էլ կան։ Նրա խոսքով` եթե անգամ այլ փաստաթուղթ չկա, դա դեռ չի նշանակում, որ չեն կարող լինել որոշակի բանավոր պայմանավորվածություններ։
Ալիևը կարծում է, որ խաղաղության համաձայնագրի համար ՀՀ-ն պետք է քաղաքական կամք ցուցաբերի
Նշենք, որ ապրիլի 20-ին ՀՀ վարչապետի պաշտոնակատար Նիկոլ Փաշինյանը կառավարության նիստում հաստատեց, որ պատրաստվում է նոր փաստաթուղթ ստորագրել Ադրբեջանի հետ, որը, նրա խոսքով, «100 տոկոսով բխում է մեր շահերից»։