Արմեն Քթոյանի դիտարկմամբ` ցանկացած բարելավում ինչ–որ չափով ուրախանալու առիթ է, բայց հարց է, թե այն որքանով նկատելի կլինի։ Ըստ նրա` աշխատաշուկային առնչվող դրական ցուցանիշներն ավելի շատ վարչարարության բարելավման, ստվերայնության նվազման և տնտեսական որոշ գործընթացների ակտիվացման արդյունք են։
«Իսկ վարչարարության բարելավում նշանակում է տնտեսվարող սուբյեկտների ավելի թափանցիկ գործունեություն, եկամուտի ավելի շատ հայտարարագրում, ավելի շատ եկամտային հարկի գանձում։ Պետական բյուջեի, պետության, պետական ծառայություններից օգտվող անձանց համար դա լավ է, բայցևայնպես ճիշտ չի լինի, եթե ասենք, որ աշխատաշուկայի ցուցանիշների բարելավումն ունենալու է էական ազդեցություն։ Դա չի նշանակում, թե տնտեսությունում որակական, թռիչքային բարելավումներ կան»,– ասաց տնտեսագետը։
Քթոյանի կարծիքով` հիմնական գործոն հանդիսացող ստվերայնության նվազումը չի էլ թաքցվում, և ՊԵԿ–ը նշում է, որ հարկային վարչարարության բարելավումից զատ, էական ազդեցություն է գործել նաև բազմաթիվ աշխատատեղեր ստվերից դուրս բերելու հանգամանքը։
Անդրադառնալով այն տեղեկությանը, որ աճել է նաև հարկային բազայի տոկոսային ցուցանիշը, Քթոյանն ընդգծեց, որ նոր աշխատատեղերի ստեղծումը կամ դրանց որոշ մասի ստվերից դուրսբերումը եկամտի առումով որոշակի ավելացում պետք է ստեղծեր։ Ըստ նրա` հարկ է նկատի ունենալ և այն հանգամանքը, որ դրանք բոլորն անվանական փոփոխականներ են, իսկ իրական առումով այդ աճը շատ ավելի համեստ է։
Հիշեցնենք, որ ՀՀ էկոնոմիկայի նախարարի ԺՊ Վահան Քերոբյանը ֆեյսբուքյան իր էջում գրառում էր կատարել, որի համաձայն` աշխատաշուկայի ապրիլյան ցուցանիշները ցույց են տալիս, որ Հայաստանում գրանցվել է աշխատողների 5,7 տոկոս, իսկ հարկային բազայի՝ 20 տոկոս աճ 2019 թվականի ապրիլի նկատմամբ։ Նա հավելել է, որ 2020 թվականի հետ որևէ համեմատություն չի արել, քանի որ բնակչությունը գտնվել է լոքդաունի մեջ։
Հայաստանի բանկերը պետք է հավելյալ հարկ վճարեն հակաճգնաժամային վարկերի համար. տնտեսագետ