ԵՐԵՎԱՆ, 16 մայիսի – Sputnik. Ադրբեջանի ու Թուրքիայի զինված ուժերի ստորաբաժանումները համատեղ վարժանքներ են անցկացրել: Տեղեկությունը հայտնում է Ադրբեջանի պաշտպանության նախարարությունը:
Նշվում է, որ զորավարժություններն անցկացվել են ադրբեջանական զորավարժարանում։ Հիմնական նպատակը եղել է փոխգործակցությունը բարելավելը և երկու երկրների բանակների ստորաբաժանումների մարտական արդյունավետությունը բարձրացնելը:
«Զորավարժությունների ընթացքում հատուկ խմբերը լուծել են օրվա տարբեր ժամերին պայմանական հակառակորդի` պաշտպանության խորք ներթափանցելու ու դարանակալելու, ինչպես նաև հրամանատարական կետ և ռազմական օբյեկտներ գրավելու խնդիրները»,–ասված է հաղորդագրության մեջ։
Առանձնահատուկ ուշադրություն է դարձվել դիվերսիոն խմբերի ոչնչացմանը, հակառակորդի սադրանքների ճնշմանը և հակաահաբեկչական գործողությունների առանձնահատկությունների ուսումնասիրմանը:
Հիշեցնենք` Ադրբեջանի պաշտպանության նախարարությունը մայիսի 16-ին հայտարարել էր զորավարժությունների մեկնարկի մասին` նշելով, որ դրանք կշարունակվեն մինչև մայիսի 20–ը։
Զորավարժություններին ներգրաված են եղել մինչև 15 000 զինծառայողներ, գործարկվել է զրահատեխնիկա, ռազմական ավիացիա և անօդաչու թռչող սարքեր։
Իսկ մայիսի 4-ին Ադրբեջանի ԶՈւ–ն ԱԹՍ–ների ուսումնավարժական թռիչքներ էր իրականացրել։