ԵՐԵՎԱՆ, 21 մայիսի - Sputnik. Ռուսաստանը կողմ է ՅՈւՆԵՍԿՕ-ի առաքելության` տարածաշրջան շուտափույթ կերպով այցի կազմակերպման հարցում։ Ճեպազրույցի ժամանակ այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան` պատասխանելով Շուշիի Ղազանչեցոց տաճարից գմբեթները հանելու մասին հարցին։
Նրա խոսքով`Լեռնային Ղարաբաղում, ինչպես նաև հարակից շրջաններում պատմամշակութային ժառանգության պահպանման թեման Մոսկվան պարբերաբար քննարկում է ինչպես պաշտոնական Բաքվի, այնպես էլ Երևանի հետ: Դրան անդրադարձ է կատարվել նաև մայիսի սկզբին Ռուսաստանի արտաքին գործերի նախարար Սերգեյ Լավրովի` Հայաստան և Ադրբեջան կատարած աշխատանքային այցի շրջանակներում։
«Մենք կողմ ենք, որ ՅՈւՆԵՍԿՕ-ի առաքելությունը տարածաշրջան այցելի շուտափույթ կերպով, այդ հարցով աշխատում ենք ԵԱՀԿ Մինսկի խմբի համանախագահների հետ։ Ընթացիկ տարվա ապրիլի 13-ին համանախագահների կողմից ընդունված հայտարարության մեջ նշված է`կրոնական և մշակութային ժառանգության պահպանումն այն հարցերից է, որը ինչպես Ադրբեջանից, այնպես էլ Հայաստանից պահանջում է լրացուցիչ ջանքեր գործադրել»,–ասել է Զախարովան:
«Հարցը ՅՈւՆԵՍԿՕ–ի դաշտում է». Վահրամ Դումանյանը` հայկական հուշարձանների ճակատագրի մասին
Հիշեցնենք, որ ավելի վաղ համացանցում հայտնվել էին Ղազանչեցոցի լուսանկարները, որտեղ էլ երևում էր, որ գմբեթները հեռացրել են։ Մինչ այդ ադրբեջանական ԶԼՄ-ները հաղորդել էին վերականգնողական աշխատանքների մասին, սակայն դառը փորձ ունենալով` դժվար է հավատալ դրան։
Մայիսի սկզբին Հայաստանի ԱԳ նախարարի պաշտոնակատար Արա Այվազյանը Ռուսաստանի արտգործնախարար Սերգեյ Լավրովի հետ համատեղ մամլո ասուլիսում հայտարարել էր, որ Ղազանչեցոցը պետք է մնա Հայ առաքելական եկեղեցու պաշտամունքի վայր։
Ալիևը պատասխանել է ՅՈւՆԵՍԿՕ–ի՝ Արցախ փորձագետների խումբ ուղարկելու առաջարկին