ԵՐԵՎԱՆ, 21 մայիսի - Sputnik. Ադրբեջանական զինված ուժերը կարող են Սյունիքի սցենարը կրկնել Տավուշի մարզում։ Sputnik Արմենիայի հետ զրույցում նման տեսակետ հայտնեց միջազգային անվտանգության հարցերի փորձագետ, ՀՀ ԶՈւ գլխավոր շտաբի նախկին պետ Օնիկ Գասպարյանի խորհրդական Վլադիմիր Պողոսյանը։
Փորձագետը մտավախություն ունի, որ առաջիկայում հակառակորդը կարող է այդ ուղղությամբ գործողություններ ձեռնարկել։ Սակայն, ի տարբերություն Սյունիքի, որտեղ հակառակորդը գաղտնի և առանց մեկ կրակոցի է հայկական տարածք ներթափանցել, Տավուշում կարող են մարտական բախումներ տեղի ունենալ։
Պողոսյանի խոսքով` հայ-ադրբեջանական սահմանին տիրող իրավիճակը պայմանավորված է Ադրբեջանի հետ տարվող «սեպարատ» բանակցություններով, իսկ Սյունիքի շուրջ ինչ–որ գործարք կա, որի նպատակը Ադրբեջանին միջանցք տրամադրելն է։ Նրա կարծիքով՝ վարչապետի պաշտոնակատար Նիկոլ Փաշինյանը նախապես հեռացրեց ԶՈւ գլխավոր շտաբի նախկին ղեկավարությանը, որը նման իրավիճակ թույլ չէր տա։
Հիշեցնենք` մայիսի 12-ի առավոտյան ադրբեջանական զինուժը «սահմանների ճշգրտման» հիմնավորմամբ փորձել է որոշակի աշխատանքներ իրականացնել Սյունիքի սահմանային հատվածներից մեկում, սակայն հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։
Նույն օրը ՀՀ վարչապետի պաշտոնակատար Նիկոլ Փաշինյանն անվտանգության խորհրդի նիստում հայտարարեց, որ սա Ադրբեջանի կողմից դիվերսիայի փորձ է, և որ խնդիրը պետք է կարգավորվի բանակցությունների միջոցով։
ՊՆ–ն մայիսի 13-ին հայտնեց, որ Ադրբեջանը հերթական սադրանքն է իրականացրել Վարդենիսի և Սիսիանի սահմանային հատվածներում։
Մայիսի 14–ին Փաշինյանը հայտարարեց, որ կեսօրին պաշտոնապես դիմել են ՀԱՊԿ և ռազմական աջակցության հարցով դիմել ՌԴ նախագահ Վլադիմիր Պուտինին։
Մայիսի 13-ից ադրբեջանցիների հետ բանակցություններ են անցկացվում։