ԵՐԵՎԱՆ, 20 մայիսի -Sputnik. Սահմանների ճշգրտումը որքան պետք է Հայաստանին, նույնքան պետք է Ադրբեջանին։ Այս մասին այսօր կառավարության նիստում հայտարարեց ՀՀ վարչապետի պաշտոնակատար Նիկոլ Փաշինյանը` մեկնաբանելով, որ ՀԱՊԿ–ը ոչ թե կրակելու, այլ ճգնաժամային իրավիճակներում էսկալացիա թույլ չտալու կազմակերպություն է։
«Ի վերջո, ինչ-որ փուլում սահմանների դեմարկացիան ու դելիմիտացիան անվտանգության կարևորագույն երաշխիք է», – ասաց Փաշինյանը` հավելելով, որ դա պարզ գործընթաց չէ։
Նրա խոսքով` տարածաշրջանում այսօր չկա մի երկիր, որն ավարտած լինի այդ գործընթացը։
Կոմունիկացիաների բացումը ևս, ըստ նրա, որքան անհրաժեշտ է Հայաստանին, նույնքան էլ` Ադրբեջանին։ Փաշինյանը հիշեցրեց, որ 1992թ–ից որդեգրվել է Հայաստանի շրջափակման քաղաքականություն։
Այդուհանդերձ, նա դարձյալ շեշտեց, որ կոմունիկացիաների բացման կոնտեքստում որևէ միջանցքի բացման հարց չի քննարկվել, չի քննարկվում ու չի քննարկվելու։
Հիշեցնենք` մայիսի 12-ի առավոտյան ադրբեջանական զինուժը «սահմանների ճշգրտման» հիմնավորմամբ փորձել է որոշակի աշխատանքներ իրականացնել Սյունիքի սահմանային հատվածներից մեկում, սակայն հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։
Նույն օրը ՀՀ վարչապետի պաշտոնակատար Նիկոլ Փաշինյանն անվտանգության խորհրդի նիստում հայտարարեց, որ սա Ադրբեջանի կողմից դիվերսիայի փորձ է, և որ խնդիրը պետք է կարգավորվի բանակցությունների միջոցով։
ՊՆ–ն մայիսի 13-ին հայտնեց, որ Ադրբեջանը հերթական սադրանքն է իրականացրել Վարդենիսի և Սիսիանի սահմանային հատվածներում։
Մայիսի 14–ին Փաշինյանը հայտարարեց, որ կեսօրին պաշտոնապես դիմել են ՀԱՊԿ և ռազմական աջակցության հարցով դիմել ՌԴ նախագահ Վլադիմիր Պուտինին։
Մայիսի 13-ից ադրբեջանցիների հետ բանակցություններ են անցկացվում։