Կառավարության անդամը տեղյակ չէ, թե ինչ է պատրաստվում ստորագրել Փաշինյանը

Զարեհ Սինանյանն անդրադարձավ ստորագրվելիք փաստաթղթին և սոցցանցերում տարածում գտած տեսանյութին։
Sputnik

ԵՐԵՎԱՆ, 20 մայիսի -Sputnik. ՀՀ Սփյուռքի գործերի գլխավոր հանձնակատար Զարեհ Սինանյանը տեղյակ չէ, թե ինչ փաստաթուղթ է պատրաստվում ստորագրել կառավարության ղեկավարը, Փաշինյանի հիշատակած 2 ժամանոց տեսագրությունն էլ չի տեսել։ Այս մասին նա հայտարարեց այսօր կառավարության նիստից հետո լրագրողների հետ ճեպազրույցում։

«Դուք լսեցինք ինչ ասվեց վիդեոյի մասին։ Ասվեց, որ դա երկու ժամանոց վիդեոյից մի փոքր հատված է։ Կարող է մյուս հատվածում էլ մեր զինվորներն են իրենց են ստորացնում։ Եթե դրանից հետո մենք էլ իրենց ենք ստորացնում, ուրեմն արդարացված է»,– ենթադրեց Սինանյանը։

Սահմանների ճշգրտումը որքան պետք է Հայաստանին, նույնքան պետք է Ադրբեջանին. Փաշինյան

Ինչ վերաբերում է Վատիկանում ՀՀ նախկին դեսպան Միքայել Մինասյանի հրապարակած փաստաթղթին, որի մասին այսօր Փաշինյանը հայտարարեց, որ պատրաստվում է ստորագրել այն,  Զարեհ Սինանյանը հայտարարեց, որ փաստաթղթի մասին տեղյակ չի եղել ու այդ մասին տեղեկացել է կառավարության նիստում։

Լրագրողների հարցին, թե մտավախություն չունի, որ 2020թ–ի նոյեմբերին ստորագրված հայտարարության նման անակնկալի առաջ ենք կանգնելու, Սինանյանը պատասխանեց. «Աշխարհում ամեն բան հնարավոր է։ Ես հիմա այս քննարկմանը ծանոթ չէի։ Ես առաջին անգամ եմ լսում, որ որևէ հող կարող է հանձնվել»։

Հիշեցնենք, որ Միքայել Մինասյանը մայիսի 19–ին Facebook–ում գրել էր, որ երեկ երեկոյան ավարտվել է Հայաստանի և Ադրբեջանի միջև կնքվելիք նոր հայտարարության փաստաթղթի ձևակերպման աշխատանքը։

«Ահա փաստաթուղթը, որի մասին գրել էի». Միքայել Մինասյանը լուսանկար է հրապարակել

Նրա խոսքով` Այդ փաստաթղթում դիվանագիտորեն, գեղեցիկ ձևակերպումներով, ըստ էության, ձևակերպվում է նոր դեմարկացիան՝ Հայաստանի համար աղետալի հետևանքներով։

Ըստ Մինասյանի` դեմարկացիան հիմնված է լինելու երեք սկզբունքի հիման վրա՝ ԽՍՀՄ քարտեզների, աշխարհագրական նպատակահարմարության և այդ պահին եղած իրական պատկերի։ Սրա հետևանքով, ըստ նրա, Նիկոլ Փաշինյանը քննարկման առարկա է դարձրել Տավուշի մարզի 5 գյուղերը և Արարատի մարզի մեկ գյուղն Ադրբեջանին հանձնելը։

Իսկ այսօր կառավարության նիստում ՀՀ վարչապետի պաշտոնակատար Նիկոլ Փաշինյանը հայտարարեց, որ պատրաստվում է ստորագրել այդ փաստաթուղթը։