Հակոբ Ավետյանի փոխանցմամբ`վերջին երկու օրվա ընթացքում սահմանին ադրբեջանցիների հետ որևէ միջադեպ չի գրանցվել, երկու կողմերն էլ սպասողական վիճակում են, սպասում են բանակցությունների արդյունքներին։ Ըստ նրա` ամենակարևոր հանգամանքն այն է, որ ադրբեջանցիների կողմից առաջխաղացում չկա։
«Բանակցությունների վերաբերյալ ինֆորմացիա ստանում ենք։ Ես ժողովրդից ոչինչ չեմ թաքցնում։ Ընդհանրապես չեմ ցանկանում, որ խուճապ առաջանա, և երբ ներկայացնում ենք իրական վիճակը, մարդիկ ավելի լավ են ընկալում այն։ Մեր ժողովուրդն առհասարակ այս պատերազմի ընթացքում այնքան բան տեսավ, որ ադրբեջանցիների սահմանային սադրանքները կարողանում է նորմալ տանել, խուճապի չի մատնվում»,– նշեց Գեղամասար խոշորացված համայնքի ղեկավարը։
Ավետյանի խոսքով`հայկական կորպուսն իր հրամանատարի գլխավորությամբ լավ մարտավարություն է ընտրել և պաշտպանական միջոցներ կիրառելով` թույլ չի տալիս ադրբեջանցիներին թիկունքի հետ կապված մատակարարման գործողություններ իրականացնել և տեղանքում ամրանալ` կասեցնելով հակառակորդի առաջխաղացումը։ Ըստ Ավետյանի` հայ զինվորականների կազմակերպչական աշխատանքներն իսկապես տեսանելի են ու արդյունավետ. երբ ինքը բարձրանում է հենակետեր, տեսնում է նրանց հաստատակամությունն ու խիզախությունը։
«Ամեն դեպքում վտանգը կա, ճիշտ կլինի` մեր համաքաղաքացիները պահպանեն իրենց անվտանգությունը, եթե, օրինակ, հովիվները տեսնում են ադրբեջանցիներին, ապա նախընտրելի է, որ մոտ չգնան, որովհետև հարաբերական անդորրը կարող է ցանկացած պահի խախտվել։ Այդուհանդերձ, ադրբեջանցիների ներկայությունը լուրջ խոչընդոտ է անասնապահության համար ու թեև այդ հանգամանքը մտահոգում է մարզի սահմանամերձ գյուղերի բնակիչներին, սակայն նրանք զբաղվում են գյուղատնտեսական աշխատանքներով»,– նշեց Գեղամասարի ղեկավարը։
Ավետյանի պնդմամբ` հայկական կողմի համար կա մեկ լուծում` ադրբեջանցիները պարտադիր պետք է նահանջեն ու հեռանան ՀՀ տարածքից, որովհետև ոչ մի կերպ հնարավոր չէ հարմարվել առկա իրավիճակին և վարդենիսցիները պատրաստ են նաև հարցի ուժային լուծման տարբերակին, պատրաստ են մասնակցել բոլոր անհրաժեշտ գործողություններին։
Ռուսաստանը կարող է միջնորդ դառնալ Հայաստանի ու Ադրբեջանի միջև սահմանագծման հարցում. Լավրով
Հիշեցնենք` մայիսի 12-ի առավոտյան ադրբեջանական զինուժը «սահմանների ճշգրտման» հիմնավորմամբ փորձել է որոշակի աշխատանքներ իրականացնել Սյունիքի և Գեղարքունիքի սահմանային հատվածներիում, սակայն հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։
Նույն օրը ՀՀ վարչապետի պաշտոնակատար Նիկոլ Փաշինյանն անվտանգության խորհրդի նիստում հայտարարեց, որ սա Ադրբեջանի կողմից դիվերսիայի փորձ է, և որ խնդիրը պետք է կարգավորվի բանակցությունների միջոցով։
ՊՆ–ն մայիսի 13-ին հայտնեց, որ Ադրբեջանը հերթական սադրանքն է իրականացրել Վարդենիսի և Սիսիանի սահմանային հատվածներում։
Մայիսի 14–ին Փաշինյանը հայտարարեց, որ կեսօրին պաշտոնապես դիմել են ՀԱՊԿ և ռազմական աջակցության հարցով դիմել ՌԴ նախագահ Վլադիմիր Պուտինին։
Հայաստանի և Ռուսաստանի ԱԽ քարտուղարները քննարկել են սահմանին ստեղծված իրավիճակը
Մայիսի 13-ից ադրբեջանցիների հետ բանակցություններ են անցկացվում։ Դրանք շարունակվելու են այսօր՝ մայիսի 19-ին։