Իշխանությունն ուզում է փոխել Զինծառայողների ապահովագրության հիմնադրամի վճարումների չափերը

ԵՐԵՎԱՆ, 19 մայիսի - Sputnik.Հայաստանի իշխանությունը պատրաստվում է փոխել Զինծառայողների ապահովագրության հիմնադրամին ամսական վճարումների չափերը:

Համապատասխան օրինագիծն ընդգրկվել է պաշտպանության ու անվտանգության հարցերի մշտական հանձնաժողովի օրակարգում: Ըստ առաջարկվող փոփոխությունների՝ հիմնադրամի վճարումները հետևյալ տեսքը կունենան:

• Մինչև 100 000 դրամ հաշվարկման բազայի դեպքում` 1500 դրամ (առանց փոփոխությունների )
• 100 001-ից մինչեւ 150 000 դրամ հաշվարկման բազայի դեպքում` 2000 դրամ (ներկայում 3000 դրամ է)
• 150 001-ից մինչև 300 000 դրամ հաշվարկման բազայի դեպքում` 3000 դրամ
• 300 001-ից մինչեւ 500 000 դրամ հաշվարկման բազայի դեպքում` 5000 դրամ (ներկայում 5500 դրամ է)
• 500 001-ից մինչեւ 750 000 դրամ հաշվարկման բազայի դեպքում` 7500 դրամ (ներկայում 8500 դրամ է)
• 750 001-ից մինչև 1 500 000 դրամ հաշվարկման բազայի դեպքում` 15000 դրամ ներկայում մեկ միլիոնից ավելի դեպքում 15 000 դրամ է)
• 1 500 001 դրամ և ավելի հաշվարկման բազայի դեպքում` 20 000 դրամ։

Օրինագծի հեղինակներից Գևորգ Պապոյանը նիստում նշեց, որ վճարումների գումարները փոխվում են նաև անհատ ձեռնարկատերերի համար:

Հիմա 1,2 միլիոն դրամ եկամուտ ունենալու դեպքում հիմնադրամին 18 հազար դրամ են վճարում։ Պատգամավորն առաջարկում է գումարը թողնել 18 հազար, բայց հաշվարկային բազան ավելացնել մինչև 2,4 միլիոն:

2,4-ից մինչև 6 մլն դրամի եկամտի դեպքում առաջարկվում է նվազեցնել վճարումը 66 հազար դրամից մինչև 24 հազար: 6-ից 12 միլիոն դրամի եկամտի դեպքում առաջարկվում է 108 հազարից նվազեցնել 48 հազար դրամի։ 12 միլիոն դրամ և ավելի եկամուտ ունենալու դեպքում 180 հազար դրամի փոխարեն առաջարկվում է վճարել 120 հազար դրամ։

Պապոյանի խոսքով՝ այդ փոփոխությունները չեն անդրադառնա հիմնադրամի աշխատանքի, կայունության ու փոխհատուցման հնարավորության վրա: Միաժամանակ այդ փոփոխությունները կարող են խթանել տնտեսության վերականգնումն ու բիզնեսի զարգացումը։

Օրինագծի համահեղինակ Արտակ Մանուկյանը նշեց, որ Հայաստանում շուրջ 35 հազար անհատ ձեռներեց է գրանցված:

Հիշեցնենք, որ 2017 թվականի հունվարի 1-ից Զինծառայողների ապահովագրության հիմնադրամը հայրենիքի պաշտպանության համար 1-ին կամ 2-րդ խմբի հաշմանդամություն ստացած զինծառայողներին փոխհատուցում է տրամադրում: Փոխհատուցումները տրամադրվում են նաև 2017թվականի հունվարի 1-ից հետո զոհված կամ անհետ  կորած ճանաչված զինծառայողների ընտանիքներին (շահառուներին):

Զինծառայողների ապահովագրության հիմնադրամը հատուցել է 3036 զոհերի ընտանիքների