ԵՐԵՎԱՆ, 17 մայիսի – Sputnik․Արցախի մարդու իրավունքների պաշտպան Գեղամ Ստեփանյանը նամակ է ուղարկել Եվրոպայի խորհրդի մարդու իրավունքների հանձնակատար Դունյա Միյատովիչին։ Տեղեկությունը հրապարակվել է Արցախի ՄԻՊ գրասենյակի Facebook-յան էջում։
Պաշտպանը համագործակցության պատրաստակամություն է հայտնել և ընդգծել, որ դա հանուն մարդու իրավունքների պաշտպանության է, որն այսօր Արցախի երկրի համար է՛լ ավելի կարևոր է` հաշվի առնելով ադրբեջանա-թուրքական ագրեսիայի հետևանքով երկրի և ժողովրդի առջև ծառացած հումանիտար խնդիրների ծավալն ու բարդությունը:
Նա հիշեցրել է, որ պատերազմի ընթացքում ադրբեջանական զինված ուժերն իրականացրել են միջազգային մարդասիրական իրավունքի կոպտագույն խախտումներ, միտումնավոր և չտարբերակված ձևով թիրախավորել են քաղաքացիական բնակչությանը, երեխաներին, տարեցներին, լրագրողներին, հայկական մշակութային ժառանգությունը․ նրանք սպանել են գերեվարված հայ զինծառայողներին և քաղաքացիական անձանց, խեղել և խոշտանգել նրանց մարմինները: Այսօր էլ Ադրբեջանում անհայտ պայմաններում 200-ից ավելի ռազմագերիներ են պահվում, շուրջ 40.000 մարդ դարձել է ներքին տեղահանված, մի շարք հայկական մշակութային հուշարձաններ մինչ օրս ենթարկվում են վանդալիզմի և ոչնչացվում:
Արցախի ՄԻՊ-ը տեղեկացրել է, որ պատերազմի հենց առաջին օրվանից իր գրասենյակը նախաձեռնել է փաստահավաք առաքելություն՝ նպատակ ունենալով ուսումնասիրելու և արձանագրելու պատերազմի ընթացքում և պատերազմից հետո Ադրբեջանի կողմից իրականացված խախտումներն ու ռազմական հանցագործությունները: Այդ արդյունքները ներկայացվել են տասնյակից ավելի արտահերթ զեկույցներում:
«Կցանկանայի նշել, որ հետպատերազմական հումանիտար իրավիճակի գնահատման ուղղությամբ փաստահավաք աշխատանքները շարունակվում են և միջազգային գործընկերների, խորհրդարանական մարմինների և իրավապաշտպան կազմակերպությունների ներկայությունը տեղում իրավիճակը գնահատելու առումով շատ կարևոր է»,- նշված է պաշտպանի նամակում։
Գեղամ Ստեփանյանը ԵԽ մարդու իրավունքների հանձնակատարին հորդորել է փոխադարձ ջանքեր գործադրել Արցախի ժողովրդի իրավունքները պաշտպանելու ուղղությամբ։ Նամակում նա շեշտել է՝ միջազգային հանրության պարտականություններից է ապահովել մարդու իրավունքների պաշտպանությունն աշխարհի բոլոր անկյուններում` անկախ տարածքի միջազգային կարգավիճակից, ներառյալ Արցախը։