ԵՐԵՎԱՆ, 14 մայիսի – Sputnik. Իշխանասարում ադրբեջանցիների ներկայությունն իրական վտանգի տակ է դնում Սյունիքի որոշ համայնքների բնակիչների համար խմելու ջրի հասանելիությունը։ Այս մասին Սյունիքում լրագրողների հետ զրույցում ասաց ՀՀ ՄԻՊ Արման Թաթոյանը։
«Խոսքը ոչ միայն ոռոգման ջրի կամ խոշոր ու մանր եղջրավոր կենդանիների խմելու ջրի մասին է, այլև մարդկանց խմելու ջրի»,– ասաց նա։
Ընդ որում, այդ վտանգներն առկա են ոչ միայն Գորիսի, այլև Սիսիանի տարածաշրջանի բնակավայրերում։
«Այդ վտանգներն առկա են Տեղ համայնքում, Խոզնավար, Խնածախ, հատկապես` Վաղատուր գյուղերում, իհարկե, նաև Սիսիան համայնքի գյուղերում»,– ասաց Թաթոյանը։
ՄԻՊ–ը նաև հայտնեց, որ այդ վտանգի մասին բազմիցս տեղեկացրել է միջազգային կառույցներին` շեշտելով հայ–ադրբեջանական սահմանին անվտանգության գոտու առկայության անհրաժեշտության մասին։
«Այստեղ պետք են շատ վճռական քայլեր միջազգային կառույցների կողմից` թույլ չտալու այս խախտումները։ Այն, ինչ հիմա կատարվում է, բացահայտ խախտում է այն բոլոր ստանդարտները, որոնք տարիների ընթացքում միջազգային հանրությունը ստեղծել է»,– նշեց Թաթոյանը։
Ի դեպ, անվտանգության գոտին, Թաթոյանի համոզմամբ, չի կարող ստեղծվել Հայաստանի ինքնիշխան տարածքի հաշվին։
Ի՞նչ է կատարվում Գեղարքունիքի մարզի Կութ և Վերին Շորժա գյուղերում. պատմում են բնակիչները