ԵՐԵՎԱՆ, 14 մայիսի - Sputnik. ԱԺ ԲՀԿ խմբակցության քարտուղար Արման Աբովյանի համար անհասկանալի է «Իմ քայլը» խմբակցության գործընկերների և իշխող թիմի` հայ-ադրբեջանական հարաբերությունների մասին փոփոխված դիրքորոշումը։ «Իմքայլական գործընկերների այսօրվա տեսակետները միանգամայն այլ են, հանկարծակի 180 աստիճանով փոխվել են ալիևյան կլանի ու նրա վարած քաղաքականության նկատմամբ»,- հայտարարեց Աբովյանը ընդդիմության նախաձեռնած արտահերթ ԱԺ նիստի եզրափակիչ ելույթում։
«Տպավորություն է, որ կիսատ-պռատ իրավիճակ է։ Մի կողմից ելնում ասում ենք` Թուրքիան, Ադրբեջանը էս են, էն են... Հա, ճիշտ ենք անում, բան չեմ ասում, բայց կներեք, ընդամենը մեկ ամիս առաջ կամ անմիջապես պատերազմից հետո դիվանագիտական հարաբերությունների մասին էիք խոսում, կամ ինչ-որ կոմունիկացիաների, ճանապարհների մասին... Մեռանք մեզ ճղելով, որ իրենք դա ընդունում են որպես թուլություն»,- ասաց նա։
Աբովյանը ստեղծված իրավիճակից դուրս գալու համար առաջարկեց քննարկել, հասկանալ առաջացած խնդիրների խորքային պատճառները, հակառակ դեպքում կշարունակենք դոփել տեղում։
Պատգամավորը նաև տարակուսանք հայտնեց, թե ինչու ՀՀ պաշտպանական գերատեսչության ղեկավար Վաղարշակ Հարությունյանը, որը քննարկման կեսից միայն միացավ խորհրդարանականներին, այդպես էլ ոչինչ չասաց երկրի անվտանգության ապահովման նպատակով հրավիրված արտահերթ նիստում։
Իրավիճակից խաղաղ դուրս գալու հնարավորություններ դեռ կան. Մարուքյան
«ՊՆ նախարարը եկավ նստեց, տպավորություն էր, որ ուղեկցեց կառավարության անդամներին ու գնաց տուն»,- հավելեց Աբովյանը։
«Իմ քայլը» խմբակցության ղեկավար Լիլիթ Մակունցն էլ Աժ ամբիոնից հորդորեց ներքաղաքական հարցերը չխառնել անվտանգային հարցերին։ Ասաց` իշխող թիմը շահագրգռված է տարածաշրջանային կայունության պահպանմամբ և ամեն ինչ անում է, որ ՀՀ պետական տարածք ներխուժած ադրբեջանցիները խաղաղ ճանապարհով վերադառնան ելման դիրքեր։
«Այդ մասին է վկայում նաև այն արձագանքը, որը ՀՀ-ն տվել է Ադրբեջանի սադրած գործողություններին և ՀՀ տարածքային ամբողջականության նկատմամբ ոտնձգությունների փորձերին։ Մենք դիմել ենք այն անվտանգային կառույցին, որի մաս ենք կազմում։ Աշխատում ենք նաև միջազգային մեր մյուս գործընկերների հետ»,- ընդգծեց Մակունցը։
Հիշեցնենք` ՀՀ ՊՆ մամուլի ծառայությունը հայտնել էր, որ մայիսի 12-ի առավոտյան ադրբեջանական զինուժը, «սահմանների ճշգրտման» հիմնավորմամբ, փորձել է որոշակի աշխատանքներ իրականացնել Սյունիքի սահմանային հատվածներից մեկում, սակայն հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։
Նույն օրը ՀՀ վարչապետի պաշտոնակատար Նիկոլ Փաշինյանն Անվտանգության խորհրդի նիստում հայտարարեց, որ սա Ադրբեջանի կողմից դիվերսիայի փորձ է, և որ խնդիրը պետք է կարգավորվի բանակցությունների միջոցով։
ՊՆ–ն մայիսի 13-ին հայտնեց, որ Ադրբեջանը հերթական սադրանքն է իրականացրել Վարդենիսի և Սիսիանի սահմանային հատվածներում։
ԱԽ նիստ կայացավ նաև մայիսի 13-ին։ Փաշինյանը հայտարարեց, որ հանձնարարել է ՀԱՊԿ պայմանագրով նախատեսված խորհրդակցություններ սկսել։