ԵՐԵՎԱՆ, 8 մայիսի – Sputnik. Ոստիկանության բարձրագույն ղեկավարությունը համալրվել է ևս մեկ փոխոստիկանապետով։ ՀՀ նախագահ Արմեն Սարգսյանի հրամանագրով Կամո Ցուցուլյանը նշանակվել է հանրապետության ոստիկանության պետի տեղակալ։ Հրամանագիրը հրապարակված է նախագահի պաշտոնական կայքի «Փաստաթղթեր» բաժնում։
«Հիմք ընդունելով վարչապետի առաջարկությունը` համաձայն Սահմանադրության 133-րդ հոդվածի 1-ին մասի, ինչպես նաև «Ոստիկանությունում ծառայության մասին» օրենքի 13-րդ հոդվածի 3-րդ մասի՝ Կամո Ցուցուլյանին նշանակել Հայաստանի Հանրապետության ոստիկանության պետի տեղակալ»,- նշված է հրամանագրում։
Հավելենք, որ Կամո Կոլյայի Ցուցուլյանը ծնվել է Տավուշի մարզի Իջևան քաղաքում։ 2020 թվականից մինչ այժմ զբաղեցնում էր ՀՀ ոստիկանության Արարատի մարզային վարչության պետի պաշտոնը։
Կից ներկայացնում ենք Ոստիկանության պաշտոնական կայքում հրապարակված կենսագրությունը։
Ծնվել է 1973 թ. հունվարի 2-ին Իջևան քաղաքում:
1995 թ. ավարտել է Երևանի ճարտարապետաշինարարական պետական ինստիտուտը,
2009 թ.՝ ՀՀ ոստիկանության ակադեմիան:
13.03.1996 – 06.03.1998 թթ. ծառայել է ՀՀ զինված ուժերում։
29.12.2001 – 11.06.2003 թթ. Տավուշի մարզային ՆԳ վարչության օպերատիվ կապի և հատուկ տեխնիկայի գծով ինժեներ։
11.06.2003 – 27.07.2004 թթ. ՀՀ ոստիկանության Տավուշի մարզային վարչության Իջևանի բաժնի անչափահասների գործերով խմբի տեսուչ։
27.07.2004 – 21.05.2010 թթ. ՀՀ ոստիկանության Տավուշի մարզային վարչության Իջևանի բաժնի ՔՀ բաժանմունքի օպերլիազոր, ավագ օպերլիազոր։
21.05.2010 – 19.12.2011 թթ. ՀՀ ոստիկանության Տավուշի մարզային վարչության Դիլիջանի բաժնի պետի օպերատիվ գծով տեղակալ։
19.12.2011 – 30.12.2011 թթ. ՀՀ ոստիկանության Տավուշի մարզային վարչության Դիլիջանի բաժնի պետ։
30.12.2011 – 28.02.2012 թթ. գրանցվել է ՀՀ ոստիկանության կադրերի ռեզերվում։
28.02.2012 – 12.06.2013 թթ. ՀՀ ոստիկանության Տավուշի մարզային վարչության շտաբի պետ։
12.06.2013 – 27.06.2013 թթ. գրանցվել է ՀՀ ոստիկանության կադրերի ռեզերվում։
27.06.2013 – 29.11.2013 թթ. ՀՀ ոստիկանության Տավուշի մարզային վարչության պետի տեղակալ։
29.11.2013 – 19.06.2020 թթ. ՀՀ ոստիկանության Տավուշի մարզային վարչության պետի օպերատիվ գծով տեղակալ։
19.06.2020 թ.-ից ՀՀ ոստիկանության Արարատի մարզային վարչության պետ։
Պարգևատրվել է ՀՀ նախագահի 2016 թ. հրամանագրով` «Հասարակական կարգի գերազանց պահպանման համար» մեդալով, նաև ՀՀ ոստիկանության և այլ գերատեսչությունների մեդալներով ու կրծքանշաններով:
Ամուսնացած է, ունի երկու երեխա: