ԵՐԵՎԱՆ, 4 մայիսի – Sputnik. Հնդկաստանի հոգևոր առաջնորդ, քաղաքական գործիչ և փիլիսոփա Մահաթմա Գանդիի` Երևանում տեղադրված արձանը պղծած տղամարդը հայտնաբերվել է։ Տեղեկությունը հայտնում են ՀՀ ոստիկանության մամուլի ծառայությունը։
Նա Երևան քաղաքի 61-ամյա բնակիչ է, որը մայիսի 3-ին բերման է ենթարկվել Մաշտոցի բաժին և տվել խոստովանական ցուցմունք:
Ինչպես արդեն հայտնել էինք, ապրիլի 28-ին անհայտ անձը կամ անձինք վնասել էին Հալաբյան և Մարգարյան փողոցների հարակից զբոսայգում տեղադրված Մահաթմա Գանդիի արձանը և պատվանդանը:
Ոստիկանության Երևան քաղաքի վարչության և Մաշտոցի բաժնի քրեական հետախույզներն ու ԱԱԾ Երևան քաղաքի վարչության ծառայողները համատեղ ձեռնարկած միջոցառումներով պարզել են արարքը կատարողի ինքնությունը:
Կատարվում է նախաքննություն: