ԵՐԵՎԱՆ, 30 ապրիլի - Sputnik. Երևանի մանկական երկաթուղու թունելից թանձր ծխի պատճառը հայտնի է` մալուխներն են այրվել։ Լրագրողների հետ զրույցում ասաց դեպքի վայրում աշխատող ԱԻՆ փրկարար ծառայության փրկարարական ուժերի վարչության հրդեհաշիջման և փրկարարական աշխատանքների կազմակերպման բաժնի պետ Արթուր Ոսկանյանը։
Ավելի վաղ հայտնել էինք, որ առավոտից թանձր ծուխ է դուրս գալիս երկաթուղու թունելից։
«Օջախն արդեն հայտնաբերվել է, ուժերը դասավորում են, որ մարման աշխատանքներ կատարեն։ Հավանաբար, բարձր լարում է տեղի ունեցել, որի հետևանքով էլ ջերմությունից մալուխները բռնկվել են։ Այնտեղ 6000 վտ հզորությամբ 30 մալուխներ կան»,–ասաց Ոսկանյանը։
Նրա խոսքով` հիմա ամբողջ տարածքը հոսանքազրկել են։ Ոսկանյանը հայտնեց նաև, որ փորելու կարիք չկա, պետք է հորի մեջ մտնեն փրկարարները, որպեսզի մարեն ծուխը։
Այս պահին 3 մարտական հաշվարկ է աշխատում դեպքի վայրում, և հիմնական դժվարությունը, ըստ Ոսկանյանի, ծխապատ գոտին է, որը, սակայն, հաղթահարելի է։