ԵՐԵՎԱՆ, 29 ապրիլի – Sputnik․ ՀՅԴ մի շարք ներկայացուցիչներին հարցաքննության կանչելը որևէ առնչություն չունի դատախազության մոտ այսօր նախատեսված բողոքի ակցիայի հետ։ Facebook-ի իր էջում գլխավոր դատախազի խորհրդական Գոռ Աբրահամյանը նշում է, որ այս երկուսն իրար հետ բացարձակապես կապ չունեն, ու պատճառահետևանքային կապ էլ չկա։ Նրա տեղեկացմամբ՝ հարցաքննության հրավիրվելու վերաբերյալ ծանուցագրերը կոնկրետ քրեական գործով առձեռն ՀՅԴ գործիչներին սկսել են փոխանցվել դեռևս ապրիլի 27-ից:
«Մասնավորապես՝ Արծվիկ Մինասյանին ծանուցագիրը առձեռն փոխանցվել է ապրիլի 27-ին, Գերասիմ Վարդանյանին՝ ապրիլի 28-ին, իսկ Գեղամ Մանուկյանին ծանուցագիրը հնարավոր է եղել փոխանցել միայն այսօր առավոտյան՝ ավելի վաղ տեխնիկական պատճառներով դա իրականացնելը չհաջողվելու պատճառով: Ինչ վերաբերում է Իշխան Սաղաթելյանին և Տարոն Տոնոյանին, ապա նրանք որևէ գործով ՀՀ ՔԿ Երևան քաղաքի քննչական վարչություն չեն հրավիրվել»,- նշված է գրառման մեջ։
Նշենք, որ այսօր ավելի վաղ փաստաբան Բենիկ Գալստյանը գրառում էր կատարել, որ Երևան քաղաքի քննչական վարչությունը հարցաքննության է կանչել դաշնակցական 5 գործիչների։ Նրա խոսքով՝ դա արվել է այն բանից հետո, երբ ՀՅԴ Գերագույն մարմինը հանդես եկավ հայտարարությամբ, «որով մեր երկրում տիրող իրավական «բարդակի» կապակցությամբ բոլոր անհանգիստ քաղաքացիներին հրավիրեց այսօր՝ ժամը 17:00-ին հավաքվել ՀՀ գլխավոր դատախազության մոտ»։
Երևանում ոստիկաններից մեկն ուշագնաց եղավ բողոքի ակցիայի ժամանակ, բերման ենթարկվածներ կան
Գալստյանի խոսքով՝ դրանից հետո հարցաքննության են կանչվել «ՀՅԴ անկյունաքարային դեմքերը»՝ Իշխան Սաղաթելյանը, Արծվիկ Մինասյանը, Գեղամ Մանուկյանը, Տարոն Տոնոյանը, Գերասիմ Վարդանյանը։