ԵՐԵՎԱՆ, 26 ապրիլի – Sputnik. Արդեն մեկնարկել են 2023 թվականի հուլիսի սկզբին Հայաստանում և Արցախում սպասվելիք Հայաստանի 6-րդ միջազգային բժշկական համագումարի նախապատրաստական աշխատանքները։ Հայաստանի, Սփյուռքի և Արցախի առողջապահական և բժշկական հանրույթներին միավորող 6-րդ միջազգային բժշկական համագումարի նախագահությունը ստանձնել է «Արաբկիր բժշկական կենտրոնի» գիտական ղեկավար, պրոֆեսոր Արա Բաբլոյանը։
Օրերս կայացած կազմակերպչական կոմիտեի անդրանիկ նիստում քննարկվել և հաստատվել է առաջիկա գործողությունների պլանը, ժամանակացույցը, ինչպես նաև կազմակերպչական աշխատանքների իրականացման ոլորտային պատասխանատուների շրջանակը։
Հայաստանի 6-րդ միջազգային բժշկական համագումարն ընթանալու է «Միասին կարող ենք» կարգախոսի ներքո։ «Հաշվի առնելով ներկա իրողություններն, ինչպես նաև Հայաստանի, Արցախի և Սփյուռքի առջև ծառացած մի շարք մարտահրավերները այս կարգախոսի ներքո մեր մասնագիտական համախմբվածությունն ավելի քան կարևոր է և անհրաժեշտ»,- կազմակերպչական կոմիտեի նիստում նշել է համագումարի պատվավոր նախագահ Արա Բաբլոյանը։
Համագումարի Սփյուռքի թևը ներկայացնող համանախագահ Գևորգ Յաղջյանի խոսքով՝ համագումարը մեկ հարկի տակ է համախմբելու առողջապահական ոլորտի ճանաչված մասնագետների, մեծ փորձառություն ունեցող բժիշկների, բուժաշխատողների՝ վերջիններիս թույլ տալով հաղորդակից լինել և յուրացնել միջազգային առաջադեմ փորձի ոլորտային ձեռքբերումները։
Համագումարի հայաստանյան թևը ներկայացնող համանախագահ Համբարձում Սիմոնյանն էլ նշեց, որ համագումարի շրջանակներում առանձնահատուկ ուշադրություն է դարձվելու Հայաստանի և Արցախի առողջապահական ոլորտների առջև ծառացած բարդ և հրատապ խնդիրներին։ Համագումարի արցախյան թևը ներկայացնող համանախագահ Վիգեն Խաչատուրյանի խոսքով էլ համագումարի կարևոր առաքելություններից է ոչ միայն առողջապահության ոլորտի նորարարական ձեռքբերումների ներկայացումը, այլ նաև այնպիսի մեխանիզմների մշակումը, որոնք թույլ կտան տեղայնացնել և ապահովել այդ ձեռքբերումների գործնական կիրառումը։
Ավելի քան 70 տարվա աշխատանքային փորձ. գործընկերները հիշում են «Մարդ-լեգենդ» բժիշկին
Համագումարի շրջանակներում նախատեսված հետագա գործողությունների, միջոցառումների, համագումարին մասնակցության մեխանիզմների մասին ամբողջական տեղեկատվությունը հասանելի կլինի առաջիկայում գործարկվելիք համագումարի պաշտոնական կայքում։