ՀՀ Անվտանգության խորհրդի քարտուղար Արմեն Գրիգորյանի վերջին հայտարարությունն իշխանության նախընտրական քարոզչության համատեքստում է և աղերս չունի իշխող թիմի իրական տեսակետի ու պլանների հետ։ Sputnik Արմենիայի հետ զրույցում նման կարծիք հայտնեց քաղաքագետ Ստեփան Դանիելյանը։
«Իրենց համար թիվ 1 մտահոգությունը վերընտրվելն է և, քանի որ ԱԽ քարտուղարի նախորդ հայտարարությունը խիստ բացասական արձագանք է ստացել, կարծում եմ` այդ տպավորությունը ցրելու համար էր արված այս նոր հայտարարությունը»,- ասաց նա։
Դանիելյանը չի բացառում, որ հնարավոր ընտրությունների շեմին հայաստանյան լսարանի համար որոշակի հակաթուրքական «նյուանսներ» հնչեն, սակայն անգամ նախընտրական քարոզարշավի շեմին թշնամական երկրների հասցեին իշխանությունների շուրթերից կոշտ հայտարարություններ պետք չէ ակնկալել։
Քաղաքագետը հիշեցնում է` հատկապես հետպատերազմյան շրջանում Ադրբեջանի և Թուրքիայի որևէ հակահայկական հայտարարություն իշխող վարչակազմի կողմից համարժեք արձագանք չի ստացել, ավելին` հայրենի կառավարությունը թշնամական երկրների հետ լավ հարաբերություններ ու բարեկամական կապեր հաստատելու կոչեր է հնչեցրել։
«Եթե հաշվի առնենք նախկին հայտարարությունները, թե իրենք ուզում են Թուրքիայի հետ հարաբերությունների մասին ինչ-որ պայմանագիր կնքել, և կարծում եմ`ստվերում ունեն նախնական ձեռք բերված պայմանավորվածություններ, այդ առումով կոշտ հայտարարություններ չեն լինի»,- նշեց Դանիելյանը։
«Սա միայն հայերի պայքարը չէ». Էմանուել Մակրոնը նամակ է հղել ՀՀ նախագահ Արմեն Սարգսյանին
Քաղաքագետի կարծիքով` Ադրբեջանի ղեկավարի` Հայաստանի տարածքում ուժով ինչ-որ հարց լուծելու, Երևանն ադրբեջանական քաղաք անվանելու հոխորտանքներին պետք է այլ հարթության մեջ և ժամանակին պատասխանել և ոչ թե ռուսական լրատվամիջոցների միջոցով դաշնակից պետությանը բողոքել, թե Ադրբեջանն իրեն «խելոք» չի պահում։
Հիշեցնենք` Հայաստանի Անվտանգության խորհրդի քարտուղար Արմեն Գրիգորյանը ՌԻԱ Նովոստիի հետ հարցազրույցում հայտարարել է, որ հակամարտությունը Ղարաբաղում վերջնականորեն լուծված չէ, Ադրբեջանի հետ խաղաղության համաձայնագրի մասին կարելի է մտածել այն ժամանակ, երբ Բաքուն պատրաստ լինի կառուցողական երկխոսության։