Երկրի հնագիտության նախկին նախարար Զահի Հավասի գլխավորած առաքելությունը Նեղոսի ափին՝ Լուքսորի մոտ, բնակավայր է հայտնաբերել:
«Ոսկե քաղաքը» Եգիպտոսի տարածքում հայտնաբերված ամենամեծ բնակավայրն է։ Այն կառուցվել է Ամենխոտեպ III-ի օրոք (մ.թ. ա. 1391-1353 թթ.)։ Ավելի ուշ, երբ Եգիպտոսում իշխում էին Էխնատոն, Թութանհամոն և Էյե փարավոնները, «Ոսկե քաղաքը» վարչական և տնտեսական ամենամեծ կենտրոնն էր։
Հնագետները գտել են շինությունների հատվածներ, որոնցում պահպանվել են պատերը, իսկ դրանցում՝ հին եգիպտացիների կենցաղի առարկաներ։ Գտածոների թվում են զարդեր, քանդակներ, կավե իրեր։
Ջոնս Հոպկինսի համալսարանի (ԱՄՆ) Եգիպտագիտության պրոֆեսոր Բեթսի Բրայանի կարծիքով՝ «Ոսկե քաղաքը» «Թութանհամոնի դամբարանից հետո երկրորդ խոշորագույն հնագիտական հայտնագործությունն է»:
Ներկայացնում ենք ուշագրավ լուսանկարներ՝ հայտնաբերված քաղաքից։