ԵՐԵՎԱՆ, 14 ապրիլի – Sputnik. Երևանում թիվ 54 համարի երթուղային միկրոավտոբուսի մեջ տեղի ունեցած սպանություն կատարողը Արտաշատ քաղաքի բնակիչ է՝ ծնված 1963թ.: Տեղեկությունը հայտնում են ՀՀ քննչական կոմիտեի մամուլի ծառայությունից։
Նշվում է, որ ենթադրյալ հանցագործություն կատարած անձի ինքնությունը պարզելուց բացի ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնում կատարված քննչական և դատավարական այլ գործողությունների արդյունքում պարզվել են այսօր երթուղային միկրոավտոբուսի մեջ տեղի ունեցած սպանության մի շարք հանգամանքներ, շարժառիթը։
«Նախաքննությամբ պարզվել է, որ 2021թ. ապրիլի 14-ին՝ ժամը 10:10-ի սահմաններում, Արտաշատ քաղաքի 57-ամյա բնակիչը երթուղային միկրոովտոբուսի մեջ դիմակ չկրելու հետ կապված՝ Երևան քաղաքի 39-ամյա բնակչի կողմից արված դիտողության հարցի շուրջ վիճաբանել է վերջինիս հետ, որի ընթացքում իր մոտ գտնվող դանակով երեք հարված է հասցրել տղամարդու կրծքավանդակին` ապօրինաբար դիտավորությամբ կյանքից զրկելով նրան»,–ասվում է հաղորդագրության մեջ:
Ձեռնարկվում են միջացառումներ՝ 57-ամյա տղամարդուն հայտնաբերելու ուղղությամբ:
Նախաքննությունը շարունակվում է:
Փախչելիս հեռախոսն ընկել է. «Գազելում» սպանություն կատարած անձի ինքնությունը պարզվել է