ԵՐԵՎԱՆ, 12 ապրիլի – Sputnik. Այս տարվա ընթացքում «Դայակ պետության աջակցությամբ» ծրագրին է դիմել 175 քաղաքացի։ Տեղեկությունը հայտնում է ՀՀ աշխատանքի և սոցիալական հարցերի նախարարությունը։
«Ծրագիրը շարունակվում է․ դիմել կարող են Միասնական սոցիալական ծառայությունների տարածքային կենտրոններում հաշվառված, մինչև երեք տարեկան երեխայի խնամքի արձակուրդում գտնվող այն քաղաքացիները, որոնք մինչև երեխայի երկու տարին լրանալը վերադառնում են աշխատանքի»,– նշված է հաղորդագրության մեջ։
Ծնողների ընտրությամբ՝ երեխայի խնամքը կարող է կազմակերպվել կա՛մ վճարովի հիմունքներով գործող նախադպրոցական հաստատություններում, կա՛մ դայակի օգնությամբ:
Մինչև երկու տարեկան յուրաքանչյուր երեխայի խնամքի համար վճարվող գումարի չափը կազմում է դայակի կամ վճարովի հիմունքներով գործող նախադպրոցական հաստատության հետ կնքված պայմանագրով սահմանված ամսական վարձատրության 50 տոկոսը, բայց ոչ ավելի, քան նվազագույն ամսական աշխատավարձի չափը:
«Դայակ պետության աջակցությամբ» ծրագրի տևողությունը յուրաքանչյուր տարվա համար 11 ամիս է:
Հաշմանդամ երեխաներին խնամող ծնողների կենսաթոշակները կբարձրանան