ԵՐԵՎԱՆ, 12 ապրիլի - Sputnik. Վարչապետ Նիկոլ Փաշինյանի հետ հանդիպումից հետո անհետ կորած զինծառայողների ծնողները հայտնեցին` պայմանավորվել են առաջիկայում ԱԱԾ տնօրենի հետ հանդիպել։
Նշենք, որ անհետ կորած զինծառայողների հարազատներն այսօր կառավարության առջևբողոքի ակցիա էին իրականացնում` պահանջելով հանդիպում Նիկոլ Փաշինյանի հետ։ Ցույցի մեկնարկից որոշ ժամանակ անց ծնողներին հրավիրեցին կառավարության շենք։ Նրանք քիչ առաջ դուրս եկան շենքից։
«Հանդիպումը մեզ չբավարերեց։ Այն, ինչ պետք է տեղեկանայինք, կիսատ մնաց, այսինքն` ինչ գիտեինք, էդքան էլ մնաց մեր իմացածը»,–ասաց անհետ կորածներից մեկի հարազատը։
Նրա խոսքով` նման հանդիպումները շարունակական են լինելու։ Մեկ այլ զինվորի մայր էլ նկատեց` կառավարությունում շուրջ 10 հանդիպում են ունեցել, բայց ի՞նչ են ստացել։ Իրավիճակը, ըստ նրա, ոչ մի կերպ չի փոխվում, ոչ մի քայլ չի արվում իրենց տղաներին գտնելու ուղղությամբ։
«Ես չեմ գնալու կառավարության մոտից, իսկ ներսում գտնվողներն էլ դուրս չեն գալու` մինչև մեզ կոնկրետ պատասխան չտան, թե ինչ են անում մեր տղաներին վերադարձնելու համար»,–ասաց կինը։
«ԳՇ պետն ասաց` իրավասու չէ լուծում տալ». անհետ կորածների ծնողների հետ հանդիպումն ավարտվեց
Նշենք, սակայն, որ հանդիպման մտած ծնողները դուրս եկան կառավարության շենքից։
Հիշեցնենք, որ պաշտոնական տվյալներով` մոտ 200 ռազմագերի կա Ադրբեջանում, բայց Ադրբեջանը խոսում է միայն 72–ի մասին։
Հայաստանում Ռուսաստանի դեսպան Սերգեյ Կոպիրկինն այսօր հայտնել էր` Ադրբեջանում մնացած հայ գերիների վերադարձը Ռուսաստանի համար առաջնահերթ խնդիրներից է։