ԵՐԵՎԱՆ, 10 ապրիլի – Sputnik. Եգիպտոսում պեղումների ժամանակ անհետացած քաղաք են հայտնաբերել։ Տեղեկությունը հայտնել է երկրի զբոսաշրջության նախարարությունը:
Երկրի հնագիտության նախկին նախարար Զահի Հավասի գլխավորած առաքելությունը Նեղոսի ափին՝ Լուքսորի մոտ, բնակավայր է հայտնաբերել:
«Արտասահմանյան բազմաթիվ հնագիտական առաքելություններ փնտրել են այդ քաղաքը, բայց ապարդյուն»,- մեջբերում է ՌԻԱ Նովոստին գերատեսչության նախկին ղեկավարի հաղորդագրությունը։
«Ոսկե քաղաք»
«Ոսկե քաղաքը» Եգիպտոսի տարածքում հայտնաբերված ամենամեծ բնակավայրն է։ Այն կառուցվել է Ամենխոտեպ III-ի օրոք (մ.թ. ա. 1391-1353 թթ.)։ Ավելի ուշ, երբ Եգիպտոսում իշխում էին Էխնատոն, Թութանհամոն և Էյե փարավոնները, «Ոսկե քաղաքը» վարչական և տնտեսական ամենամեծ կենտրոնն էր։
Հնագետները գտել են շինությունների հատվածներ, որոնցում պահպանվել են պատերը, իսկ դրանցում՝ հին եգիպտացիների կենցաղի առարկաներ։ Գտածոների թվում են զարդեր, քանդակներ, կավե իրեր։
Քաղաքի գոյության ժամանակաշրջանը հաջողվել է պարզել հայտնաբերված գինու անոթների օգնությամբ. տարաների վրա հիերոգլիֆներ կան։ Բացի այդ, հնագետներին օգնել է քարե շարվածքը. դրա վրա Ամենխոտեպ III-ի կնիքներն են դրված եղել:
Հայտնաբերված «Ոսկե քաղաքը» իրենից ներկայացնում է վարչական, հուղարկավորման ու բնակելի տարածքներ: Ժամանակին այստեղ կային հացի փուռ ու արհեստանոցներ։ Հնագետները առանձնահատուկ հույսեր են կապում հուղարկավորության համար նախատեսված հատվածի հետ՝ ակնկալելով այնտեղ «գանձերով լի անձեռնմխելի դամբարաններ» գտնել:
Ջոնս Հոպկինսի համալսարանի (ԱՄՆ) Եգիպտագիտության պրոֆեսոր Բեթսի Բրայանը վստահ է, որ գտածոն կօգնի իմանալ, թե ինչպես են ապրել հին Եգիպտոսում՝ կայսրության ծաղկման ժամանակ: Նրա խոսքով՝ «Ոսկե քաղաքը» «Թութանհամոնի դամբարանից հետո երկրորդ խոշորագույն հնագիտական հայտնագործությունն է»: