ԵՐԵՎԱՆ, 7 ապրիլի – Sputnik. Քննարկելու շատ հարցեր կան, բայց ամենահրատապ ու ամենասուր խնդիրը ԼՂ–ի շուրջ ու հենց ԼՂ–ում իրավիճակի կայունացումն է։ Այսօր Մոսկվայում մեկնարկած Պուտին–Փաշինյան հանդիպման ժամանակ ասել է ՌԴ նախագահ Վլադիմիր Պուտինը։
«Ես չեմ խոսի այն մասին, թե որքան խորն են մեր հարաբերություները, որոնք իրականում ռազմավարական բնույթի են, չեմ թվարկի բոլոր այն միջազգային հարթակները, որոնցում մենք համագործակցում ենք։ Բայց կարծում եմ` կարևոր է հիշել, որ Հայաստանի տնտեսության ներդրումների 40 տոկոսը ռուսական ծագում ունի»,– ասել է Պուտինը։
ՌԴ նախագահը շեշտել է, որ 2020թ–ին տարբեր պատճառներով, բայց առաջին հերթին, նրա գնահատմամբ, համավարակի հետևանքով` երկու երկրների ապրանքաշրջանառությունը էապես նվազել է։
«Վստահ եմ, որ մոտ ապագայում մենք կարող ենք ոչ միայն վերականգնել ապրանքաշրջանառության ծավալը, այլև առաջ ընթանալ»,– ասել է Պուտինը։
ՌԴ նախագահը նկատել է, որ ՀՀ–ՌԴ միջկառավարական հանձնաժողովն ակտիվ աշխատում է։
Հիշեցնենք` ՀՀ վարչապետ Նիկոլ Փաշինյանն աշխատանքային այյցով Մոսկվա է մեկնել այսօր` ապրիլի 7-ին։ Մինչ այդ նա հարցազրույց էր տվել ՌԻԱ Նովոստիին և ասել` ինչ թեմաներ է քննարկելու ՌԴ նախագահ Վլադիմիր Պուտինի հետ, խոսել էր հայկական բանակում տիրող իրավիճակի մասին, անդրադարձել ԶՈւ գլխավոր շտաբին ու ԱԺ արտահերթ ընտրություններին: