Երևանի «Սուրմալու» առևտրի կենտրոնում բռնկված հրդեհն ամբողջությամբ մարվել է։ Տեղում լրագրողների հետ զրույցում հայտնեց փրկարարական ջոկատի ղեկավար, մայոր Արթուր Մարդանյանը։
«Տեղում կուտակված այրվող նյութերը շատ են, տակից ծխում են, և հիմա փրկարարները քանդում ու մարում են այդ օջախները։ «Ձյունիկ» սառնարաններում բռնկված հրդեհից հետո սա ամենախոշորն է»,–ասաց Մարդանյանը։
Նրա խոսքով` հրդեհի հետևանքով տուժածներ չկան, և ծխացող օջախների ամբողջական մարումն այսօր կավարտեն։
Հիշեցնենք, որ «Սուրմալուում» այրվել են խաղալիքների և տնտեսական ապրանքների տաղավարներ՝ գույքով: Ավելի վաղ հայտնել էինք, որ գիշերն առևտրի կենտրոնում հրդեհ է բռնկվել, հայտարարվել է հրդեհի բարդության թիվ 3 կանչ։