ԵՐԵՎԱՆ, 31 մարտի – Sputnik.Հայաստանում ամենաբարձր վարկանիշ ունեցող գործիչը ՀՀ մարդու իրավունքների պաշտպան Արման Թաթոյանն է: Այդ մասին են վկայում «Գելլափ Ինթերնեյշնլ Ասոցիացիայի» հայաստանյան ներկայացուցիչ «Էմ Փի Ջի» ընկերության անցկացրած վարկանիշային հարցումների արդյունքները:
Ըստ այդ արդյունքների` Թաթոյանն առավելագույն 5 միավորից ստացել է 3.7 բալ: Գործող վարչապետ Նիկոլ Փաշինյանը ստացել է 2.7 բալ, ՀՀ նախագահ Արմեն Սարգսյանը` 2.4 բալ, ՀՀ երկրորդ նախագահ Ռոբերտ Քոչարյանն ու ԲՀԿ նախագահ Գագիկ Ծառուկյանը`2.1 բալ, «Լուսավոր Հայաստանի» նախագահ Էդմոն Մարուքյանը՝ 1.9, ՀՀ երրորդ նախագահ Սերժ Սարգսյանը` 1.6, ՀՅԴ ԳՄ ներկայացուցիչ Իշխան Սաղաթելյանը՝ 1.5, նախկին վարչապետ Վազգեն Մանուկյանը՝ 1.5, «Հայրենիք» կուսակցության նախագահ Արթուր Վանեցյանը՝ 1.4 բալ:
Հարցվածների 7 տոկոսը տեղյակ չի եղել, որ Հայաստանում հունիսի 20-ին նախատեսվում է անցկացնել ԱԺ արտահերթ ընտրություններ: Հարցվածների 35.5 տոկոսը միանշանակ վստահություն է հայտնել Փաշինյանի կազմակերպած ընտրությունների արդարությանն ու թափանցիկությանը, 29.7 տոկոսը միանշանակ անվստահություն է հայտնել: 41 տոկոսը նշել է, որ կմասնակցի ընտրություններին, 15.5 տոկոսը՝ ոչ:
«Եթե ընտրությունները լինեն հաջոր կիրակի, ո՞ր քաղաքական ուժի օգտին կքվեարկեք» հարցին 31.7 տոկոսը պատասխանել է՝ «Իմ քայլը» դաշինք, 5.9 տոկոսը՝ Ռոբերտ Քոչարյան, 4.4 տոկոսը՝ ԲՀԿ, 2.7 տոկոսը՝ ԼՀԿ, 2.4-ը՝ ՀՀԿ, 2.1-ը՝ ՀՅԴ, 1 տոկոսը՝ Վազգեն Մանուկյան, 0.5 տոկոսը՝ «Սասնա ծռեր» կուսակցություն, 0,4 տոկոսը՝ «Հայրենիք» կուսակցություն, 0.4`ը «Հանրապետություն» կուսակցություն, 0,1 տոկոսը՝ «Քաղաքացու որոշում» կուսակցություն: 24.6 տոկոսը նշել է, որ ոչ մեկի օգտին չի քվեարկի, ևս 20 տոկոսը դժվարացել է պատասխանել: