Ձվի գնի արհեստական բարձրացման հիմնական մեղավորներն առաքիչներն են, որոնք փոքր խմբերով մտնում են սուպերմարկետներ կամ խոշոր առևտրի կենտրոններ, մեծ քանակությամբ ձու գնում, այնուհետև գնվածն իրացնում փոքր խանութներում։ Sputnik Արմենիայի հետ զրույցում նման կարծիք հայտնեց ՀՀ թռչնաբույծների միության նախագահ Սերգեյ Ստեփանյանը։
Ստեփանյանն, ի դեպ, նման եզրահանգման է եկել խանութներում կատարած ուսումնասիրությունների արդյունքում։
«Նրանք, ովքեր փոքր խանութներին են մատակարարել և հիմա հնարավորություն չունեն դա անել, 4-5 հոգով մտնում են, մեծ քանակությամբ գնում են, տանում են փոքր խանութներին են տալիս, ու այդպես գինը բարձրանում է»,- ասաց նա։
Նախկինում արտադրող ընկերությունները ձուն խանութներին էին հասցնում առաքիչների միջոցով, հիմա արդեն իրենք են ապրանքը տեղ հասցնում, ինչի հետևանքով առաքիչները փոքր խանութների հույսին են մնում։ Փոքր խանութներն էլ իրենց հերթին լսելով, որ սպառողների շրջանում աժիոտաժ է, փորձում են առիթից օգտվել, վերահսկող մարմինն էլ կարծես չի ուզում տեղից շարժվել։
«Արտադրողն ամեն օր արտադրանքի հաշիվ-ֆակտուրան ուղարկում է Տնտեսական մրցակցության հանձնաժողով։ Ստանում են` հա, տեսնում են` հա, դե թող վերահսկեն, արտադրողը չի կարող վերահսկել, դա իր գործը չէ։ Թող գնան խանութին ասեն` առաջ 10 տոկոս էիր ավելացնում, հիմա ինչու ես 20 դրել, չէ որ դրանից խանութն էլ է սկսում օգտվել, որ տեսնում է աժիոտաժ է, ասում է` սպասի 2 դրամ բարձրացնեմ, ամեն 3 օրը մեկ 2 դրամ բարձրացնում է»,- ասաց Ստեփանյանը։
Միսն էժանանում է, բայց ուրախանալու քիչ բան կա. ինչպես են հունվարին աճել գները Հայաստանում
Նշենք, որ վերջին օրերին որոշ խանութներում և սուպերմարկետներում ձվի դեֆիցիտ է նկատվում. փոքր չափի մեկ ձուն վաճառվում է 75, միջինը՝ 86, իսկ մեծ չափի ձվի գինը հասնում է 100 դրամի: