ԵՐԵՎԱՆ, 17 մարտի - Sputnik. «Բարգավաճ Հայաստան» կուսակցության անդամները դեռ չգիտեն, թե երբ տեղի կունենա իրենց առաջնորդ Գագիկ Ծառուկյանի ու վարչապետ Նիկոլ Փաշինյանի հանդիպումը և ընդհանարապես կկայանա, թե ոչ։
«Հանդիպում դեռ չի եղել։ Ես լրատվամիջոցներից իմացա, որ հանդիպում է ծրագրվում։ Այս պահին նման թեմա չկա», - Sputnik Արմենիայի թղթակցին ասաց ԲՀԿ-ական պատգամավոր Նաիրա Զոհրաբյանը։
ԲՀԿ խմբակցության քարտուղար Արման Աբովյանը ևս նշեց, որ առաջիկա հանդիպման մասին տեղեկություն չունի: Հարցրինք` իսկ իրականությանը համապատասխանո՞ւմ է այն տեղեկությունը, թե Ծառուկյանը պայման է դրել՝ հանդիպում կլինի մի պայմանով, որ հետո հայտարարվի Փաշինյանի հրաժարականի մասին և ընտրությունների կոնկրետ օրը։
«ԶԼՄ-ներում շրջանառվող լուրերը, ցավոք, հաճախ ընդամենը խոսակցություններ են։ Ես որևէ տեղեկություն չունեմ», - ասաց նա։
ԱԺ ԲՀԿ-ական փոխնախագահ Վահե Էնֆիաջյանն էլ լրագրողներին ասաց. «Հանդիպման մասին հենց տեղեկություն եղավ, բնականաբար, թե՛ դուք, թե՛ ժողովուրդը կիմանան»։
ՀՀ վարչապետի մամուլի քարտուղար Մանե Գևորգյանն ավելի վաղ Sputnik Արմենիայի թղթակցի հետ զրույցում հերքել էր այն տեղեկությունը, թե Փաշինյանի և Ծառուկյանի հանդիպումը կայանալու է այսօր։
Հիշեցնենք՝ Փաշինյանն արտահերթ ընտրությունների օրակարգով արդեն հանդիպել է «Լուսավոր Հայաստան» խմբակցության ղեկավար էդմոն Մարուքյանի հետ։ «Բարգավաճ Հայաստանը» չէր ընդունել վարչապետի հրավերը: Հանդիպումից հետո «Լուսավոր Հայաստանը» հայտնել էր, որ հուշագիր չեն ստորագրելու:
Ծառուկյանը Փաշինյանի հետ հուշագիր պետք է որ չստորագրի. Սաղաթելյան