ԵՐԵՎԱՆ, 16 մարտի - Sputnik. Տարածաշրջանային իրավիճակը փոխվել է նոյեմբերի 9-ի հրադադարի եռակողմ համաձայնագրից հետո։ ԱԳ նախարար Արա Այվազյանի հետ հանդիպումից հետո նման հայտարարություն արեց ԵԱՀԿ գործող նախագահ, Շվեդիայի ԱԳ նախարար Անն Լինդեն։
«Ես ողջունում եմ հրադադարը։ Հրադադարի համաձայնագրի լրիվ իրականացումը հիմք կհանդիսանա կոնֆլիկտի լուծման գործընթացում։ Այս առումով ողջունում եմ Մինսկի խմբի նախագահների ջանքերը` առճակատման երկարաժամկետ ու կայուն լուծում գտնելու հարցում, սակայն մի քանի հարցեր դեռ լուծման կարիք ունեն»,–ասաց ԵԱՀԿ գործող նախագահը։
Նրա խոսքով` այս փուլում կարևոր է նաև հարգանք դրսևորել միջազգային իրավունքի հանդեպ, ներառյալ՝ մարդասիրական իրավունքի։
Անն Լինդեն կոչ արեց բոլոր կողմերին խնդիրները լուծել խաղաղ ճանապարհով, ԵԱՀԿ մինսկի խմբի նախագահության շրջանակներում։ Նա շեշտեց, որ տարածաշրջանում ընթացիկ իրավիճակը գտնվում է ԵԱՀԿ–ի ուշադրության կենտրոնում։
Լինդեն նշեց, որ տպավորված է Հայաստանում 2018-ից սկսված ժողովրդավարական բարեփոխումներով։ Սակայն վերջին շաբաթների ընթացքում տեսավ, թե որքան փխրուն կարող է լինել այդօրինակ առաջընթացը։
Պատերազմից հետո էլ Ադրբեջանը դեռ հայ ռազմագերիներին գերեվարության մեջ է պահում. Այվազյան
Հիշեցնենք, որ մարտի 14-ին ԵԱՀԿ գործող նախագահը տարածաշրջանային այցի շրջանակում մեկնել էր Ադրբեջան, հանդիպել նախագահ Իլհամ Ալիևի և արտգործնախարար Ջեյհուն Բայրամովի հետ: