ԵՐԵՎԱՆ, 15 մարտի - Sputnik. «Լուսավոր Հայաստան» խմբակցությունը կարծում է, որ մինչև հունիսի 1-ը պետք է արտահերթ խորհրդարանական ընտրություններն ավարտված լինեն։ ԱԺ–ում լրագրողների հետ զրույցում այս մասին հայտնեց ԼՀԿ ղեկավար Էդմոն Մարուքյանը։
«Սա նշանակում է՝ առաջիկա տասն օրում խորհրդարանի լուծարման գործընթացը պետք է մեկնարկի։ Հունիսի 1-ից հետո մենք չենք կարող երաշխավորում ունենալ, որ խորհրդարանում վարչապետի թեկնածուի ինքնառաջադրումներ չեն լինի։ Ժամկետը կարևոր է, քանի որ ճգնաժամը խորն է, և արագ հանգուցալուծում է պետք»,–ասաց Մարուքյանը։
Նա նշեց նաև, որ այս փուլում արտահերթ ընտրություններ անցկացնելու համար կոնսենսուսի հնարավորություն կա, բայց դեռ հստակ չի կարող ասել` կոնսենսուս կա։ Ավելին, կոնսենսուսը կկայանա, եթե ընտրությունները կայանան իրենց նշած ժամկետում, իսկ եթե չէ, ապա, ըստ Մարուքյանի, վերջ, այդ թեման կարող են փակված համարել և անցնել հաջորդ հարցին։
Մարուքյանի խոսքով` այժմ արտահերթ ընտրությունների գնալը չեղարկելու պատրվակ իշխանությունը չունի, և կարծես թե դրան գնալու կամք է նկատում իշխանության շրջանում:
Փաշինյանի համար իր աթոռից թանկ բան չկա. Սաղաթելյանը` ընտրությունների կեղծման վտանգի մասին
Հարցին, թե արտահերթ ընտրություններ լինելու պարագայում ինչպե՞ս է Մարուքյանը գնահատում ԼՀԿ–ի շանսերը, հնարավո՞ր է` իշխանությունը հենց նրանք էլ վերցնեն, Մարուքյանը վստահ պատասխանեց` այո։ «Մենք արդեն խորհրդարանում ունենք մեր ներկայացուցչությունը և մասնակցելու ենք ընտրություններին` ավելիին հասնելու նպատակով»,–ասաց Մարուքյանը։
Ինչ վերաբերում է ռազմական դրությանը, ապա այն, ինչպես նշեց ԼՀԿ ղեկավարը, պետք է չեղարկվի, որպեսզի ընտրությունները կազմակերպվեն։
Հիշեցնենք՝ արտահերթ ընտրությունների օրակարգով Փաշինյանն արդեն հանդիպել է «Լուսավոր Հայաստան» խմբակցության ղեկավար էդմոն Մարուքյանին։ «Բարգավաճ Հայաստանը» չէր ընդունել վարչապետի հրավերը: Հանդիպումից հետո «Լուսավոր Հայաստանը» հայտնել էր, որ դեռ վերջնական որոշում չունի՝ Փաշինյանի հետ ընտրությունների անցկացման հուշագիր կստորագրի, թե ոչ։ Այսօր Մարուքյանը հայտարարել է, որ հուշագիր չեն ստորագրելու: