Հայաստանի նկատմամբ զբոսաշրջային հետաքրքրությունն աստիճանաբար մեծանում է, սակայն դեռ շատ անելիք կա, որ ոլորտը նորից վերակենդանանա։ Sputnik Արմենիայի հետ զրույցում ասաց Տուրիզմի հայկական ֆեդերացիայի նախագահ Մեխակ Ապրեսյանը։
«Հետաքրքրվողներ կան, կամաց-կամաց ի հայտ են գալիս` ոչ մեծ քանակով իհարկե։ Դա հույս է ներշնչում, բայց նաև անհրաժեշտություն կա, որ մենք ժամանակին համակարգված ու ակտիվ գործողություններ իրականացնենք, որ այդ հետաքրքրություններն ավելանան»,- ասաց նա։
Որ այդ հետաքրքրությունները զուտ հետաքրքրությունների մակարդակում չմնան և այցելություններ դառնան, անհրաժեշտ է կորոնավիրուսի և պատերազմի բացասական հետևանքների չեզոքացման և զարգացման կարճաժամկետ միջոցառումների հատուկ ծրագիր մշակել։
«Նաև պետք է համաշխարհային շուկաներում անհրաժեշտ տեղեկատվական դաշտ ապահովենք, բացի դրանից ակտիվ մարքեթինգային քաղաքականություն իրականացնենք, անհրաժեշտ ինստիտուցիոնալ բարեփոխումներ անենք, որ կարմիրով ներկված կամ վտանգավոր երկրների ցանկից դուրս գանք»- նշեց Ապրեսյանը։
Նրա համոզմամբ` ծրագիրը պետք է մշակի և հաստատի պետությունը, իսկ ֆեդերացիան և շահագրգիռ կողմերը աջակցեն այդ ամենին։
«Ամեն օր հապաղելը, ամեն օր ուշացնելը մեծ վնաս է բերելու, որովհետև մենք այսօր պետք է և՛ հասցնենք վերականգնվենք, պահպանենք շուկայում մեր դիրքերը, և՛օգտվենք ստեղծվող հնարավորություններից` բարելավենք դիրքերը, որովհետև ինչքան ուշացնենք այնքան կտուժենք»,- հավելեց նա։
Մեկի փոխարեն երկու անձնագիր՝ հանուն զբոսաշրջության ու ընդդեմ կորոնավիրուսի
Ապրեսյանի խոսքով` կարևոր անելիք ունի նաև առողջապահության նախարարությունը, որը պետք է իր խողովակներով միջազգային հարթակներում ճիշտ ներկայացնի համաճարակային իրավիճակի տվյալները, որը, ըստ նրա, շատ երկրների համեմատ մեր երկրում ավելի լավ վիճակում է։
Նշենք, որ Էկոնոմիկայի նախարարության տվյալներով՝ 2020 թ․-ի հունվար-սեպտեմբերին 2019 թ․-ի նույն ժամանակահատվածի համեմատ զբոսաշրջիկների թիվը կրճատվել է 75,5 տոկոսով: Այս տարի Հայաստան է այցելել 327 735 մարդ։ Ընդ որում՝ 2020թ.- համար մասնագետները զբոսաշրջային հոսքի 14-15% աճ էին կանխատեսում։ Զբոսաշրջության համաշխարհային կազմակերպության տվյալների համաձայն՝ 2020 թ․-ի հունվար-հոկտեմբեր ամիսներին զբոսաշրջության ոլորտում անկումը կազմել է 72 տոկոս, ճամփորդել է 900 միլիոնով պակաս մարդ, քան անցյալ տարվա նույն ժամանակահատվածում: