ԵՐԵՎԱՆ, 13 մարտի – Sputnik. Ադրբեջանի մարդու իրավունքների պաշտպանի գրասենյակը ՀՀ ՄԻՊ գրասենյակի դեմ բողոք է ներկայացրել միջազգային կառույցներին։ Այսօր լրագրողների հետ հանդիպմանը հայտնեց Հայաստանի մարդու իրավունքների պաշտպան Արման Թաթոյանը։
«Ասում են` երբ ադրբեջանցի գերիները եղել են Հայաստանում, իբր ես անձամբ այցելել եմ քրեակատարողական հիմնարկ, իրենց հետ կոպիտ եմ խոսել։ Իրենք ուզել են ինձ հետ առանձին հանդիպել, ես մերժել եմ»,– ասաց Թաթոյանը` հավելելով, որ դա բացարձակ սուտ է։
Պաշտպանը նաև հայտնեց, որ իր ղեկավարած կառույցի ներկա կարգավիճակը թույլ է տալիս միջազգային ասպարեզում հանդես գալ իբրև ավելի վստահելի, քան Ադրբեջանի ՄԻՊ–ը։ Բանն այն է, որ Հայաստանի ՄԻՊ գրասենյակին տրվել է որակավորման բարձրագույն A կարգ, մինչդեռ Ադրբեջանի ՄԻՊ–ն ավելի ցածր` B կարգ ունի։ Ընդ որում` կարգը շնորհելիս հաշվի է առնվում նաև կառույցի ֆինանսական անկախությունը տվյալ երկրի կառավարությունից։
Թաթոյանի խոսքով` 2020թ–ին Ադրբեջանը փոփոխություն է կատարել իր ՄԻՊ մասին օրենքում` դրանում նույնությամբ ամրագրելով ՄԻՊ–ի մասին ՀՀ օրենքի ֆինանսական անկախությանը վերաբերող դրույթը, հիմա այդ հիմքով դիմել է միջազգային կառույցներին` խնդրելով վերանայել ՄԻՊ գրասենյակի վարկանիշը։
Մինչդեռ ՀՀ կառավարությունը, հակառակը,օրենքից առաջարկում է հանել նույն այդ դրույթը` դրանով, ըստ Թաթոյանի, վտանգելով ՀՀ ՄԻՊ գրասենյակին տրված միջազգային բարձրագույն վարկանիշը։
Հիշեցնենք` մարտի 11-ին կառավարության ընդունած որոշմամբ առաջարկվում է ուժը կորցրած ճանաչել «Մարդու իրավունքների պաշտպանի մասին» 2016 թվականին ընդունված սահմանադրական օրենքի 8-րդ հոդվածի 5-րդ մասը, որով ամրագրված է, որ ՄԻՊ գրասենյակի ֆինանսավորումը չի կարող ցածր լինել նախորդ տարվա բյուջեով հատկացված չափից։
Նախագիծը ներկայացվել է խորհրդարանի հաստատմանը։
Թաթոյանի մեկնաբանությամբ` կառավարության ընդունած օրենքի փոփոխության այս առաջարկը սպառնում է իր ղեկավարած կառույցի ակտիվ գործունեությանն ու բարձրացրած խնդիրներին։