ԵՐԵՎԱՆ, 12 մարտի - Sputnik. Հայրենիքի փրկության շարժման միասնական թեկնածու Վազգեն Մանուկյանն այսօր Դեմիրճյան փողոցում տեղակայված վրանում պատասխանել է լրագրողների հարցերին։ Նա մեկնաբանել է Հայաստանի նկատմամբ թուրք–ադրբեջանական տանդեմի նոր պատերազմի հնարավորության մասին լուրերը։
«Երբեք Հայաստանն այսքան թույլ չի եղել իր հակառակորդի առջև, երբեք Հայաստանն այսպիսի անպետք իշխանություն չի ունեցել, որը չի կարողանում կազմակերպել իր երկրի պաշտպանությունը։ Միակ բանը, որ պահում է Ադրբեջանին ու Թուրքիային, դա ռուսական զորքերի՝ այստեղ կանգնած լինելն է։ Մի օր Ռուսաստանը զբաղված կլինի ուրիշ պրոբլեմներով, և մեր հակառակորդները կօգտագործեն այդ առիթը»,– ասել է Մանուկյանը։
Նա նաև արձանագրել է, որ պատերազմի ամենամեծ սպառնալիքը լինում է այն ժամանակ, երբ երկիրը թույլ վիճակում է ու մտահոգություն հայտնել Սյունիքի շուրջ այսօր տեղի ունեցող սրացումների ու Ալիևի ագրեսիվ հայտարարությունների վերաբերյալ։
Անդրադառնալով ներքաղաքական իրավիճակին ու իշխանությունների` ընդդիմադիր ուժերին արած երկխոսության առաջարկին` Մանուկյանն ասել է. «Նիկոլ Փաշինյանի հետ կոմպրոմիս չկա։ Կա՛մ ինքը գնում է, կա՛մ չի գնում։ Միակ խոսակցությունը դա է։ Այս լարված պահին ընտրություններ անցկացնելն անհեթեթություն է։ Իսկ եթե թույլ ենք տալիս Նիկոլ Փաշինյանի ղեկավարությամբ անցկացնել ընտրություններ, նշանակում է լեգիտիմացնել այն խայտառակ պարտությունը, որ կրել ենք»։
Շարժման միանական թեկնածուն նաև տեսակետ է հայտնել, թե Հայաստանն աստիճանաբար վերածվում է ոստիկանական պետության, ինչը, ըստ նրա, բացառում է ընտրությունների արդյունքի ու ժողովրդի կարծիքի համընկնելու հավանականությունը։
Մանուկյանի համոզմամբ, անցած երկուսուկես տարվա ընթացքում դեպքերի ընթացքի վրա ազդելու բազմաթիվ հնարավորություններ է ունեցել հանրապետության նախագահը։ Բայց նա ոչինչ չի արել։ «Ինձ մոտ տպավորություն է, որ նա երբեք չի առաջնորդվել երկրի շահերով, առաջնորդվել է այլ շահերով»,– ասել է նա։
Մենք նախագահ չունենք, ունենք մի հատ հարուստ տուրիստ. Վազգեն Մանուկյան
Նախագահը, Վազգեն Մանուկյանի դիտարկմամբ, կարող էր նաև հարթել ՀՀ ԶՈւ ԳՇ պետի պաշտոնանկության շուրջ սրված իրավիճակը` Օնիկ Գասպարյանին ազատելու որոշումը Սահմանադրական դատարան ուղարկելով, բայց չարեց։ Արդյունքում` իրավիճակն ավելի սրվեց, ընդդիմությունը փակեց նաև Դեմիրճյան փողոցը։