ԵՐԵՎԱՆ, 9 մարտի –Sputnik. Նոյեմբերյան-Երևան ճանապարհը փակած բողոքի ակցիայի մասնակիցները հանդիպել են Տավուշի մարզպետ Հայկ Չոբանյանի հետ։ Տեղեկությունը Sputnik Արմենիային հայտնել են մարզպետարանի մամուլի ծառայությունից։
Հանդիպման մասնակիցների ընդհանուր թիվը մոտ 10-15 է։
Նշենք, որ այսօր ցերեկը նրանք փակել էին Նոյեմբերյան-Երևան ճանապարհը՝ պահանջելով հանդիպում Չոբանյանի հետ։ Բողոքի ակցիայի և հանդիպման հիմնական պատճառը Ադրբեջանի հետ սահմանին տիրող իրավիճակի վերաբերյալ մտահոգությունն է։
Ինչպես արդեն հաղորդել ենք, ավելի վաղ սոցիալական ցանցերում և տարբեր ԶԼՄ-ներում տեղեկատվություն էր տարածվել, թե Տավուշի մարզի մի քանի գյուղերի տարածքում ՌԴ-ի մոտ 500 խաղաղապահներ և ադրբեջանցիներ չափումներ են իրականացնում սահմանի երկայնքով: Ավելի ուշ այդ տեղեկությունը հերքել էր պաշտպանական գերատեսչությունը։
Սակայն սահմանի այդ հատվածի մասին տարբեր ու հակասական տեղեկությունների հոսքը չի դադարում։