ԵՐԵՎԱՆ, 7 մարտի -Sputnik. ՀՀ պաշտպանության նախարարությունը հաղորդագրություն է տարածել, որով հերքել է սահմանային լարվածության մասին լուրերը։
«Սոցցանցերում և տարբեր ԶԼՄ-ներով շարունակվում են ապատեղեկատվությունները` ՀՀ սահմաններին լարվածության, կրակոցների, հակառակորդի ԶՈւ մեծ կուտակումների վերաբերյալ:
Մասնավորապես, տեղեկություններ են շրջանսռվում, թե իբր «Իջևանի ու Շամշադինի ճակատային հատվածում թուրք-ադրբեջանական ծանր տեխնիկայի կուտակումներ են, Տավուշի 3-րդ բանակային կորպուսում հայտարարված է տագնապ» և այլն»,-ասված է հաղորդագրության մեջ:
Սյունիքում ադրբեջանցիների` ավտոմեքենայից կատարված նկարահանումը հին է. ԱԱԾ-ի պարզաբանումը
Գերատեսչությունից հավաստիացնում են, որ նշված տեղեկությունները չեն համապատասխանում իրականությանը: «Համոզիչ կերպով հորդորում ենք զերծ մնալ ակնհայտ ապատեղեկատվություն տարածելուց»:
Նշենք, որ այսօր ավելի վաղ ՀՀ պաշտպանության նախարարությունը կրկին հերքում էր տարածել, որում ասվում էր, որ սոցիալական ցանցերով և տարբեր ԶԼՄ-ներով տարածվող լուրերն այն մասին, թե Տավուշի մարզի մի քանի գյուղերի տարածքում չափագրումներ են արվում սուտ է։