Սամվել Հովհաննիսյանը կարծում է, որ ՊՊԾ–ն ԱԱԾ–ից առանձնացնելը նպատակահարմար չէ`հաշվի առնելով այն հանգամանքը, որ օրենքում կատարվող փոփոխություններից հետո անմիջապես առաջ կգան նաև կառուցվածքային փոփոխություններ, այսինքն`նոր ստորաբաժանումների ձևավորումներ, անձնակազմի թվաքանակի ավելացում, ինչն իր հետ զուգահեռաբար կբերի լրացուցիչ ֆինանսական ծախսեր։
«Ավելի քան ինը տարի աշխատել եմ այդ համակարգում որպես ծառայության պետի տեղակալ, և փոխհամագործակցությունը ԱԱԾ–ի հետ եղել է շատ արդյունավետ բոլոր ուղղություններով։ Կարծում եմ, որ հիմա էլ աշխատանքները շարունակվում են նույն ոգով և ոճով։ Այստեղ կա խնդիր` կապված կադրերի ընտրության, նրանց ընդունման և կադրերի նկատմամբ իրականացվող ուսումնասիրությունների հետ»,– Sputnik Արմենիայի հետ զրույցում ասաց նախկին փոխոստիկանապետը։
Հովհաննիսյանի խոսքով` նախկինում ամբողջ կադրային բազան գտնվում էր ԱԱԾ վերահսկողության տակ, կադրերն ընտրվում էին և համակարգ ընդունվում` անցնելով այդ ֆիլտրը, ինչն ավելի արդյունավետ էր, մինչդեռ հիմա փոփոխությունները, ըստ նրա, անխուսափելիորեն կբերեն նաև նորմատիվ իրավական բազայի փոփոխման, ինչը երկարատև աշխատանք է ու բեռ։
«Համենայնդեպս այս փուլում ԱԱԾ–ի հետ աշխատանքը պետք է նորմալ լինի։ Տեսնելով տարբեր միջոցառումներում ընդգրկված ուժերին`չգիտեմ, թե ինչ անհրաժեշտություն է առաջացել այդ ծառայությունն ԱԱԾ–ից առանձնացնելու։ Չեմ հասկանում, թե որն է այս օրենքում հապճեպ փոփոխություններ անելու հիմքը»,– նշեց ՊՊԾ պետի նախկին տեղակալը։
Պետական պահպանության ծառայությունը կենթարկվի վարչապետին, ԱԺ նախագահն էլ բժիշկ կունենա
Հովհաննիսյանի կարծիքով` բարձրաստիճան պաշտոնատար անձանց անվտանգությունն ապահովելու գործում օպերատիվ միջոցառումներ իրականացնելու առումով ԱԱԾ–ն ունի մեծ լումա և այդ կառույցի կողմից տրամադրվող ինֆորմացիան մշակման, քննարկման և իրականացման փուլում համատեղ գործողությունների համատեքստում առավել բարենպաստ է ու ցանկալի։
Գեներալ–մայորի համոզմամբ` ավելի ցանկալի կլինի, եթե Պետական պահպանության ծառայության մեջ ընդգրկվեն կինոլոգիական ծառայությունը, պատվո պահակախումբը, որը գտնվում է ՊՆ–ի կազմում և հիմնականում օգտագործվում է պետական, պաշտոնական արարողությունների ժամանակ և ՀՀ զինված ուժերի նվագախումբը։
Նշենք, որ ԱԱԾ–ն իրավական ակտերի նախագծերի հրապարակման միասնական կայքում քննարկման է դրել նախագիծ, որով առաջարկվում է «Հատուկ պետական պաշտպանության ենթակա անձանց անվտանգության ապահովման մասին» ՀՀ օրենքում փոփոխություններ և լրացումներ կատարել ու Պետական պահպանության ծառայությունն առանձնացնել ԱԱԾ–ից և դարձնել վարչապետին ենթակա մարմին։
Պատերազմից հետո մեր անվտանգային համակարգն ու բանակը ինքնահոսի են մատնվել. Վրթանեսյան