ԵՐԵՎԱՆ, 1 մարտի – Sputnik. Ռուսաստանը Հայաստանի ղեկավարությանը և երկրի բոլոր քաղաքական ուժերին կոչ է անում նպաստել իրավիճակի խաղաղ կարգավորմանը՝ տեղական օրենսդրությանը համապատասխան: Այս մասին ՌԻԱ Նովոստիին հայտնել է Դաշնության խորհրդի խոսնակ Վալենտինա Մատվիենկոն։
«Մենք Հայաստանի բոլոր քաղաքական կուսակցություններին, ուժերին, Հայաստանի ղեկավարությանը կոչ ենք անում անել ամեն ինչ, որպեսզի երկրում տեղի ունեցող իրադարձությունները կարգավորվեն խաղաղ ճանապարհով և տեղական օրենսդրությանը համապատասխան»,-ասել է նա։
Մատվիենկոն նշել է, որ Ռուսաստանում տագնապով են հետևում Հայաստանում տիրող իրավիճակին և շահագրգռված են դրա շուտափույթ կայունացման հարցում:
«Իհարկե, մենք անհանգստությամբ ենք հետևում այդ ամենին։ Եվ մենք շահագրգռված ենք, որ Հայաստանում իրավիճակը հնարավորինս արագ կայունանա։ Դա անկասկած կարևոր է հենց Հայաստանի, հայ ժողովրդի համար, դա կարևոր է նաև տարածաշրջանի կայունության համար»,-ասել է նա։
Հայաստանն օգնություն չի խնդրել Ռուսաստանից. Մատվիենկո
Իրադրությունը սրվեց այն բանից հետո, երբ ՀՀ ԶՈւ Գլխավոր շտաբը փետրվարի 25-ին պահանջեց ՀՀ վարչապետ Նիկոլ Փաշինյանի հրաժարականը, ասելով, որ քաղաքական ղեկավարությունը պետությունը տանում է դեպի վտանգավոր սահմանագիծ։ Դա տեղի ունեցավ այն բանից հետո, երբ վարչապետը պաշտոնից հեռացրեց Գլխավոր շտաբի պետի առաջին տեղակալ Տիրան Խաչատրյանին։
Ի պատասխան Նիկոլ Փաշինյանը հայտարարեց ռազմական հեղաշրջման փորձի մասին և քաղաքացիներին կոչ արեց հավաքվել Հանրապետության հրապարակում՝ «հեղափոխությունը պաշտպանելու» համար։
Նա հայտնեց նաև, ստորագրել է Գլխավոր շտաբի պետ Օնիկ Գասպարյանին պաշտոնից հեռացնելու փաստաթուղթը, որը, սակայն, ՀՀ նախագահ Արմեն Սարգսյանը չստորագրեց և հետ ուղարկեց փետրվարի 27–ին։ Նույն օրը վարչապետը կրկին առաջարկությունն ուղարկեց ՀՀ նախագահին։