ԵՐԵՎԱՆ, 25 փետրվարի - Sputnik. Ազատության հրապարակում ընթացող Հայրենիքի փրկության շարժման հանրահավաքին միացավ ՀԱՊԿ նախկին գլխավոր քարտուղար Յուրի Խաչատուրովը։ Նրան հանրահավաքի մասնակիցները դիմավորեցին ծափողջույններով։
ՀՅԴ ԳՄ ներկայացուցիչ, Հայրենիքի փրկության շարժման համակարգող Իշխան Սաղաթելյանը հայտարարեց, որ տեղեկություններ կան այն մասին, թե վարչապետի նոր հրամանով բարձրաստիճան զինվորականներ են ձերբակալվելու։
«Մենք տեղեկություններ ունենք, որ Նիկոլի հրահանգով դատախազությունը սանկցիա է պատրաստում, որ զինված խմբերի միջոցով սանկցիաներ կիրառեն, մտնեն պաշտպանության նախարարություն ու ձերբակալեն բանակի գեներալներին»,- նշեց Սաղաթելյանն ու կոչ արեց լինել բանակի կողքին։
Հիշեցնենք`ՀՀ ԶՈւ Գլխավոր շտաբն այսօր` փետրվարի 25-ին, պահանջեց ՀՀ վարչապետ Նիկոլ Փաշինյանի հրաժարականը, ասելով, որ քաղաքական ղեկավարությունը պետությունը տանում է դեպի վտանգավոր սահմանագիծ։ Դա տեղի ունեցավ այն բանից հետո, երբ վարչապետը պաշտոնից հեռացրեց Գլխավոր շտաբի պետի առաջին տեղակալ Տիրան Խաչատրյանին։
Ի պատասխան Նիկոլ Փաշինյանը հայտարարեց ռազմական հեղաշրջման փորձի մասին և քաղաքացիներին կոչ արեց հավաքվել Հանրապետության Հրապարակում՝ «հեղափոխությունը պաշտպանելու» համար։
Նա հայտնեց նաև, ստորագրել է Գլխավոր շտաբի պետ Օնիկ Գասպարյանին պաշտոնից հեռացնելու փաստաթուղթը, որը, սակայն, դեռ չի ստորագրել ՀՀ նախագահ Արմեն Սարգսյանը։