ԵՐԵՎԱՆ, 24 փետրվարի - Sputnik. Հայաստանի քաղաքացիները մարտի 1-ից կարող են օդային ճանապարհով Վրաստան մեկնել կորոնավիրուսային վարակի բացասական ՊՇՌ թեստի առկայության դեպքում: Համապատասխան որոշումն ընդունվել է համակարգող խորհրդի նիստի ընթացքում։
Վրաստանի վարչապետ Իրակլի Ղարիբաշվիլին հայտնել է, որ Վրաստանը պարզեցրել է մուտքը Հայաստանի, Ռուսաստանի, Ուկրաինայի, Ադրբեջանի, Բելառուսի քաղաքացիների համար:
«Ցամաքային սահմաններում նախկինի պես պահպանվում է այսօրվա դրությամբ գործող ռեժիմը», - ասել է Ղարիբաշվիլին:
Իշխանությունը փոխել է սահմանափակումները նաև Վրաստանի ներսում։ Մասնավորապես, փետրվարի 25-ից երկրում կգործի միջքաղաքային տրանսպորտը, հաստատությունները մարտի 8-ից կբացեն դռներն այցելուների համար:
Գիշերը Վրաստանում տեղաշարժի սահմանափակումը ուժի մեջ է մնում։ Փողոց դուրս գալը չի թույլատրվում ժամը 21։00-ից մինչև 5։00-ն։
Մեկի փոխարեն երկու անձնագիր՝ հանուն զբոսաշրջության ու ընդդեմ կորոնավիրուսի
Ավելի վաղ Հայաստանը չէր ընդգրկվել այն երկրների ցանկում, որոնց քաղաքացիները կարող են Վրաստան մուտք գործել միայն կորոնավիրուսի բացասական թեստի առկայության դեպքում: