ԵՐԵՎԱՆ, 24 փետրվարի - Sputnik. Ազգային անվտանգության ծառայությունը ևս մեկ դեպք է բացահայտել, երբ անհետ կորած զինվորի ծնողներից փորձել են գումար շորթել։
«Ա. Մ.-ն տեղեկացել է, որ ՀՀ քաղաքացի, ժամկետային զինծառայող Դ. Վ.-ն պատերազմի օրերին անհետ կորել է։ Ա. Մ.-ն զինվորի հորը՝ Գ. Վ.-ին հայտնել է, թե իբր զբաղվում է պատերազմում անհետ կորած զինծառայողների հայտնաբերման հետ կապված հարցերով: Զինվորի հոր հետ հանդիպումների ժամանակ Ա. Մ.-ն նրան տեղեկացրել է, թե իր անձնական կապերն օգտագործելով կարող է օգնել՝ հայտնաբերելու տղային, և 2021-ի փետրվարի 17-ին նրա վերաբերյալ տեղեկություններ տրամադրելու պատրվակով պահանջել է 1500 դոլար»,–նշված է ԱԱԾ հաղորդագրության մեջ։
Իրագործելով իր հանցավոր մտադրությունը՝ Ա. Մ.-ն փետրվարի 19-ին, ժամը 12:00-ի սահմաններում, Երևան քաղաքի Վ. Սարգսյան փողոցում Գ. Վ.-ից խաբեության եղանակով ստացել է 786 000 դրամին համարժեք 1500 դոլար, սակայն չի հասցրել տնօրինել հափշտակված գումարը, քանի որ անմիջապես բռնվել է ՀՀ ԱԱԾ աշխատակիցների կողմից։
Ում մեղքով են զոհվել ու անհետ կորել Հադրութ մեկնած 72 զինծառայողները
Դեպքի առթիվ ԱԱԾ քննչական դեպարտամենտում ՀՀ քրեական օրենսգրքի 34-178-րդ հոդվածի 2-րդ մասի 2-րդ կետով (Խարդախություն) հարուցված քրգործի շրջանակներում Ա.Մ.-ն ձերբակալվել է, ապա կալանավորվել։
ԱԱԾ–ն կրկին հորդորում է տուրք չտալ նմանատիպ գործարքներ առաջարկողներին՝ վստահելով միայն պաշտոնական տեղեկատվության աղբյուրներին: