2020 թվականի նոյեմբերի 9-ից հետո Հայաստանի ներքաղաքական իրավիճակը նույնն է` գործող իշխանությանը հեռացնելու հանրային պահանջը շարունակում է մնալ օրակարգային, սակայն ընդդիմությանը դեռևս չի հաջողվում հասնել կառավարության հրաժարականին։ Sputnik Արմենիայի հետ զրույցում նման կարծիք հայտնեց քաղաքագետ Ստեփան Դանիելյանը։
«Այստեղ գոյություն ունի տեխնոլոգիական և քաղաքական խնդիր և կարծում եմ, որ շատ մեծ դեր կարող են ունենալ խորհրդարանական երկու ֆրակցիաները, որոնք կարծես թե և՛ ընդդիմության հետ են խաղի մեջ, և՛ իշխանության հետ»,- ասաց նա։
Նրա խոսքով` գործող իշխանության հենարանը ոստիկանությունն է և միայն ոստիկանության ուժերի շնորհիվ է դեռևս գոյատևում իշխանությունը։ Պետք է այնպես անել, որ ոստիկանությունը անցնի ժողովրդի կողմը։
«Կարծում եմ` պետք է առաջին հերթին քաղաքական խնդիր դրվի, նաև ոստիկանության համար բավականին լեգիտիմ առիթ, որպեսզի իրենք անցնեն հանրության կողմը, համենայնդեպս միջազգային քաղաքականության մեջ խնդիրները այդ կերպ են լուծվել»,- նշեց Դանիելյանը։
Նրա կարծիքով` խորհրդարանական երկու ընդդիմադիր ֆրակցիաները ևս կարող են խնդիրը հեշտությամբ հանգուցալուծել։ Եթե ԼՀԿ-ն ու ԲՀԿ-ն մանդատները վայր դնեն՝ խորհրդարանը կհայտնվի ճգնաժամի առաջ, և կանցկացվեն արտահերթ խորհրդարանական ընտրություններ, մինչդեռ ընդդիմադիրները նշում են, որ Սահմանադրությամբ այդ ճգնաժամը չի լուծվում։
«Այդ դեպքում իր խոսքն է ասում հանրապետության նախագահը. միջազգային պրակտիկայում բազմաթիվ նման դեպքեր են եղել։ Այս հարցը պետք է դնել այդ երկու ֆրակցիաների առաջ, և նրանք պետք է կողմնորոշվեն, եթե չեն կողմնորոշվում, ապա նրանք նույն վիճակում պետք է հայտնվեն, ինչ վիճակում, որ հայտնվել են «Իմ քայլի» պատգամավորները»,- հավելեց քաղաքագետը։
Իշխանությունը պահպանելու է ՀՀ–ում կարգուկանոնը և օրինականությունը. Ալեն Սիմոնյան
Ինչ վերաբերում է մանդատները վայր դնելու մասին ԼՀԿ առաջնորդ Էդմոն Մարուքյանի հայտարարությանը, քաղաքագետն այն դեմագոգիա է որակում։
Նշենք, որ Մարուքյանը Facebook-ի իր էջում գրել է, որ ԼՀԿ պատգամավորները չեն պատրաստվում մանդատները վայր դնել, քանի որ արտախորհրդարանական ընդդիմությունը դեռևս չի կողմնորշվել` ինչ է ուզում։